Lehkhabu leh Mizoram

April ni 25 khan Mizoramah World Book Day hman a ni a, April ni 26-ah Mizo Academy of Letters din champha hman a ni leh a. He hunah hian MAL member lehkhabu pali lai release a ni a, Book of the Year 2022 chawimawina hun hman nghal a ni bawk. Ni hnih chhung a indawtin lehkhabu kaihhnawih thilah programme a awm a; lehkhabu buaipui tak chu kan ni phawt mai.
Mizoramah hian kum tin lehkhabu 150-200 vel tihchhuah ziah ang a ni a; chumi awmzia chu kum khat chhungin ni hnih danah lehkhabu pakhat zel tihchhuah ang a ni.
Lehkhabu tihchhuah kan uar ang huin a chhiartu lam an tam ngai lo tih a hriatna chu, lehkhabu tihchhuah reng reng hi copy 1000-2000 vel a ni tlangpui. Chumi awmzia chu, lehkhabu chhiar thin hi puitling chin chauh pawh lo ni ta se, Mizoram population chanve hi puitling chin angah ngai ila, mi nuai 6 vel zinga mi 2000 chauhvin lehkhabu an chhiar thin tihna a ni ang a. Hei hi tehkhawng dik chu a ni hauh lo ang a, mahse kum tin lehkhabu tihchhuah zat copy a tam theih loh dan atanga chhutin hetiang dinhmun hi kan nih hmel viau lawi si a. Lehkhabu tihchhuah zat copy 2000 hi chhiartu zat angah chanin, Mizorama lehkhabu chhiar thin chu za zela .33 (.33%) an ni tihna ang a ni a, chumi awmzia chu, chawhrualin mi 300 vel awmnaah lehkhabu chhiar thin mi pakhat zel awm ang a ni, a tih theih bawk awm e. A nihna takah chuan lehkhabu chhiar taima hi a ngai leh ngaia te hi an ni deuh mai niin a lang a; book fair velah hian a hriat viau thin.
Mipui lam chauh pawh a ni lo va, sawrkar pawh hian lehkhabu chhiar hi a ngai pawimawh tak tak bik chuang lo niin a lang. |awngkam hi chuan ram hruaitute hian lehkhabu kaihhnawih function-ah te hi chuan lehkhabu hlutna leh pawimawhna, chhiar tam a thatna te hi chu an sawi thei zel zul vek mai; chutih laiin a taka hmalakna tak tak hi chu hmuh tur a tam lo. The Mizoram Public Libraries Act, 1993 te pawh kan nei a, tun thleng hian implement a la ni lo va, Mizoram Library Association lam pawhin sawrkar thar apiang an nawr a, eng sawrkar mahin Libraries Act hi an implement duh lo. State Library pawh awlsam taka mipui ban phaka chhawp hnaih aiin a hmun kilkhawr lamah sawn hlat a la ni deuh deuh bawk. Lehkhabu tha tak tak nuai chuang awmna hmun hian, lehkhabu ngaih pawimawhna tak tak a awm lohzia a tichiang ni maiin a ngaih theih hial tawh.
Social media hian mi tin min run mek a, tunhma aiin lehkhabu ngainatna a tlahniam nasa lehzual a tih theih awm e. Hetiang karah hian lehkhabu ngaina tura kan induh chuan, thu chauh a tawk tawh lo a, lehkhabu kan inchhawpsak a ngai a ni ber tawh a. Hma la tak tak tur chuan zirtirtute bawk an pawimawh a, zirlai pawl leh tlawmngai pawl dangte nena thawhhonain awmzia thui tak a nei bawkin a rinawm.