Lei dawh zawh vangin HSA lawm

Lei dawh zawh vangin HSA lawm
Mizoram sawrkarin Manipur nena inkalpawhna lei a dawh zo ta chu an lawm hle tih Hmar Students’ Association (HSA) chuan an sawi.
HSA Gen. Hqrs. thuchhuak chuan, chief minister Pu Lalduhoma kaihhruai ZPM sawrkarin mipui leh ramin a mamawh em em, Mizoram leh Manipur inkalpawhna lei (Bailey bridge) hlawhtling leh rang taka hma laa a dawh zo mai chu sawrkar chungah leh chief minister chungah an lawm hle tih a sawi a. He hmalakna hian Mizoram pawn leh chhunga awm Mizo hnam tana an inpekna leh an sawrkarna hlawhtlin zia entirna pawimawh tak a ni, tiin, ‘Chief minister-in a lo sawi tawh angin, kan ram hausakna hrechiangin hmasawnna tura pawimawh tak inkalpawhna lei min ngaihpawimawh sak a, thu chauh ni loa thawkin, hruaitu tha a nih zia a tichiang hle a ni,’ a ti.
Adviser to chief minister Pu Lalmuanpuia Punte inpekna leh he lei hlawhtlinna tura hma a laknaah lawmawm an tih thu leh he lei hlawhtlinna tura rilru leh ngaihtuahna nasa taka sengtu leh engkima hma latu PWD minister Pu Vanlalhlana chungah pawh lawmthu an sawi tih a sawi bawk.
‘He lei hi inkalpawhna satliah ringawt a ni loa, taksa khawsakna leh politics-a inpumkhatna kawng a nih bakah thinlunga inpawhtawnna leh inlaichinna tha zawka min suihzawm sak lehtu pawimawh tak a ni a. He lei hian Mizo hnamte inpumkhatna tha zawk leh thinlung taka inpawhna min siamsak zual se tih hi kan duhthusam a ni,’ a ti.
He lei pawimawhna thuk zia hria in “Union Bridge” tia koh nise tih chu an duhthusam a nih thu leh he hming an thlan chhan pawh Mizo fate an inpumkhatna tura hranghluiten theihtawp chhuahah inpumkhattirna leh dawhkan min buatsaihsaktu “Mizo Union” tih hriatrengna tur leh inpumkhatna tura hma lo latu mihrângte hriatrengna tur leh inpumkhatna tha lehzual siamsaktu a nih theihna turin he hming hi he lei hming atan vuah nise an duh hle tih a sawi.