Leicester boss hlui Shakespeare a thi

Leicester boss hlui Shakespeare a thi
Leicester City manager hlui Craig Shakespeare chu kum 60 mi niin a thi tih Ningani khan a chhungte’n an puang.
Shakespeare hian nikum October thla atang khan cancer treatment a la tan a, a natna khirh buan mek chu a hneh zo ta lo a ni.
Leicester City bakah Shakespeare hian West Brom, Hull, Everton, Watford, Aston Villa leh Norwich a enkawl tawh a, kum 2016 khan England assistant boss hna a chelh bawk.
League Managers’ Association kaltlangin Shakespeare-a chhungte chuan an chhiat tawh thu hi an tarchhuak a, a chhungte hual vel karah thlamuang takin a kal ta tih an sawi.
2015-16 season-a Leicester-in football chanchina hlawhtlinna ropui berte zinga mi sualchhuaka Premier League title an hlawhchhuah nawlh tum khan Shakespeare hi Italian coach Claudio Ranieri assistant a ni a; February 2017-ah chuan a pu Ranieri thlakin Foxes manager puitlinga hlankai a ni a, mahse, June thlaah kum thum daih contract nghet an ziahpui chauh a, chu pawh rei inruai loin October thlaah an petchhuak zui leh ta mai a ni!
Shakespeare-a hna chelh hnuhnungber pawh Foxes assistant hna bawk ni lehin, kum 2023 April thla khan a club hluiah chuan kirlehin Dean Smith-a thachhangdawltu a ni a, rei awm leh ta chuang loin a thlaleh lawkah Premier League atangain Leicester an tla a, a chhuak zui leh ta mai a ni.
A playing career-a midfielder ni thin Shakespeare hian Walsall, Sheffield Wednesday, West Brom, Grimsby, Scunthorpe, Telford leh Hednesford football a khel thin.