Leicester leh Nistelrooy an in\hen

Leicester leh Nistelrooy an inthen
English Premier League champion hlui Leicester City leh an manager chhawr lai Ruud van Nistelrooy-te chuan inhriatthiamtawnnain an thawhdunna an titawp tih tunhnai khan an puang a; Premier League season liamtaa inhamtang zo ta lo Foxes hian tunge head coach thar atan an lakluh dawn tih an la sawi chiang thei lo.
Season thar atana inbuatsaihna tan a hun chho hnai leh tawh a, boss thar an neih hma atan first-team coaching staff lamin team hi an lo kilkawi rih dawn tih Leicester thuchhuah chuan a tarlang.
Dutch international hlui Nisterooy hin nikum November thla mai khan Steve Cooper thlak mah se Leicester City dinhmun chhe tawh tak chu a siamtha zo ta bik lo a, 2024-25 season top flight-ah game ruk chiah chak chungin Championship lamah season thar an hman a ngai dawn ta a ni.
Manchester United leh Real Madrid striker hlui Van Nistelrooy-a’n Leicester a zawm lai khan table-ah 16-na an luah a, 18-na ni chungin season a kharpui thei hram!
Kum 48 mi Dutch coach an rawih hnua an match hmasaberah 2015-16 season-a Premier League title la ve nawlh Leicester-in hnehna chang nghal mah se an beiseina thar chuan rei a daih ta chuang lo a; a hun chhung khan Nistelrooy chuan match nga chiah chakpuiin, Premier League lama inhlankai theihna hmumhim chin chu point 13 zetin an pha lo a, Championship lamah an kir leh ta a ni.
Premier League striker tha berte zinga chhiar tel ni ve kumkhua tawh tawh Van Nistelrooy hian a chipui Erik Ten Hag-a hnungzuia United assistant coach hna a chelh hma khan an ram club lian PSV Eindhoven chu manager puitling ni chungin Dutch Cup trophy a lo chawipui ve tawh a; Ten Hag an ban hlim khan manager nghet Ruben Amorim an sengluh hmain Old Trafford-ah interim coach a lo ni ve zawk tawh bawk.