Leihnuai chanchin zirnaah thiamna thar tangkaina sawiho

Leihnuai chanchin leh heng kaihhnawih thiamna thar hman tangkai dan zirhoin Nilaini khan Pachhunga University College-ah ‘International Workshop on Geodynamics and Advances in Geophysical Methods for Exploration and Geohazards’ neih a ni a. Department of Geology & Geophysics PUC leh Department of Geology, Govt. Zirtiri Residential Science College tangdun buatsaih a ni.
Workshop hmanpuitu Disaster Management & Rehabilitation minister Lalchamliana chuan kan ram dinhmun leh leilung awm dan enin thil tangkai tak, lei che kaihhnawih chhiatna laka kan him leh pumpelh theih dan, chhiatna a lo thlena ruahmanna tha siamnaa kawng kawhhmutu a nih a beisei tih a sawi a. “Science zir zelna leh zirbingna lamah thil tangkai tak, thiamna intawm theih hmanraw tha a ni thei a, hei hi scientific research pawhin a tum pawimawh tak a ni,” a ti.
Ni hnih awh workshop-ah hian geology leh geophysics lama thiamna nei mithiam 12-te paper zir ho a ni a ni a. Heng zingah hian Mizoram University associate professor Dr Laldinpuia paper, 2020 June 22-a Mizoram khawchhak lama lirnghingin a chhehvel khua ah nghawng a neih dan, LiDAR leh DGPS khawl hmanga a zirchianna pawh a tel a ni.
Workshop thuhmahruai sawi tura sawm, Institute of Geophysics Jackson School of Geosciences, University of Texas-a associate director Prof. Mrinal K Sen chu USA atang hian ama sensoin a rawn kal a. Leihnuai hausakna zawnna kawnga geophysics leh seismology zirna pawimawih dan leh khuarel chhiatna, a bikin lirnghing laka inven kawnga a pawimawhna leh hmalak theihnate a sawi.