Leilet awm sa leh la hman theih chhinchhiahna map&report hlan

On May 28, 2025 7 0

Leilet awm sa leh la hman theih
chhinchhiahna map&report hlan
Mizoram Remote Sensing Application Centre (MIRSAC) in tunlai thiamna, geospatial technology hmanga Mizorama leilet chhinchhiahna hman mek leh la hman theih tur (potential area) ri chhinchhiahna, map leh report an buatsaih chu Agriculture & Farmers Welfare department hnenah Thawhlehni khan a hlan.
Department aiawha he report bu dawngtu Agriculture & FW minister PC Vanlalruata chuan, Zopa technology, tuthlawh leh chempui ringa hun rei tak chhung Mizote kan awm tawh hnua, hetianga geospatial technology hman tangkai a ni chu Mizoram tan hmasawnna lian tak a ni tih a sawi.
He report bu leh a chhunga map ho chu sawrkarin ei leh bara intodelh tuma hma a lak meknaah a tangkai dawn hle tih a sawi bawk.
MIRSAC vice chairman Lalmalsawma Pachuau chuan North Eastern Council (NEC) sum hmang tangkai a, tunlai thiamna hmanga MIRSAC-in hun reilote chhunga hetiang zirchianna an nei thei chu fakawm a tih thu a sawi a ni.
MIRSAC principal scientist Hmingthanpuii sawi danin, hma an lakna hi thlalem thlalak fiah zawk hmang leh a hmuna kala zirchian a nih bakah GIS thiamna hmanga leilet awm theihna hi tehfung hrang hrang hmanga zawnchhuah a ni. MIRSAC zirchiannaah chuan tunah Mizorama wet rice cultivation (WRC) zau zawng chu hectare 7532.86 a ni.
MIRSAC scientist-ten Agriculture department leh a kaihhnawih department dang aiawhte hnenah report leh map hi a taka an hman tangkai dan tur a lem nen entirin an zirtir nghal a ni.