Leilet neitute buh thar lei sak theih dan zirchiang mek

Agriculture and Farmers Welfare department chuan leilet neitute buhhum thar chhuah leisak kawnga hmalakna ‘Paddy Procurement Programme’ chungchanga hriat tur tul inhrilhin Thawhlehni khan department officer-te leh leilet neitute an tel.
Hmanpuitu Agriculture & Farmers Welfare minister PC Vanlalruata chuan Mizoram sawrkarin chief minister kaihhruai The Mizoram State Government Paddy and Rice Procurement Committee a din a, hemi hnuaia din Task Force-in loneitu atangin buhhum leh buhfai leisak theih a ni em tih a zirchiang dawn tih a sawi a ni.
Mizoramah buh leh thlai chinna tur hmunhma tha tak tak vawiin thlenga la hman tangkai loh engemawzat a awm tih sawiin, “Tuna kan hman tangkai mek bakah hengte hi kan cheibawla kan hman tangkai phawt chuan kan eikhawp bakah thawn chhuah tur thlengin kan thar thei dawn a. State pawn atanga buh leh thlai lalut reng loa mahni thar chhuah hmanga intodelh tuma hma lak a pawimawh a ni,” a ti. Mahni kea ding thei turin agriculture sector bikah ram leh hnam hmangaihna thinlung, agricultural nationalism pu chunga tan lak a tul tih a sawi bawk.
Agriculture deputy director (Planning) Dr Samuel Lalliansanga chuan powerpoint presentation hmangin paddy procurement programme kalpui kawnga hriat tur pawimawh leh tunhnaia Tripura tlawha an zirchianna leh Kolasib leh Mamit district-a Wet Rice Cultivation (WRC) area neih dan survey report a sawifiah a. WRC neitu aiawhin Benjamin, IDAS (Rtd) leh ZR Thahmingliana ten thu an sawi a. Sawiho leh inrawnkhawm zui a ni.
* He hun hi Aizawl atanga Kolasib leh Mamit district chhunga leilet neitute tana tih bik a nih rualin, Kolasib leh Mamit district khaw hrang hranga sensitization programme lo kalpui tawh khaikhawmna a ni nghal a. Leilet neitute chu hralh chhuah tham neia tan la tura chah niin, ram leilung fate ngeiin a hlawkna an tel theih nana hma lak a tul zia inhrilh a ni.
* Loneitute atanga buhhum lei leh public distribution system nena thlunzawm turin minimum support price siam a tul bakah loneitute leh line department-te nena tanrual tlan a pawimawh thu sawi a ni a. Kan ram leilet ngeia buh tharte leina tura ruahhmanna leh hmalakna chu leilet neitute hrilhhriat an ni.
* Agriculture & Farmers Welfare department chuan Kolasib leh Mamit district-ah kumina leilet buh chinna hmun hectare 1280 a zau survey a neih atangin buhhum quintal 27194 thar turin a beisei a. District pahnihah hian buh chinna leilet zau (WRC cluster) 121 awmin leilet neitu 2252 awma chhut a ni.
* Kum 2017- 2018 khan department hian Special Programme for Establishment of Mini-Rice Mill chu state danga buh hralh a nih loh nan leh leilet neitute hamthatna turin a lo kalpui tawh a. Paddy Procurement Programme hlawhtlinna tur hian kumin July thla tir khan Mamit leh Kolasib district-ah paddy procurement sensitization drive kalpui niin, sawrkarin buh tharchhuah man man zawka a lei tur inhrilhhriat leh sawiho a ni.
* Agriculture & Farmers Welfare department atangin joint director leh deputy director-te chuan Paddy Procurement Programme lo hlawhtlinpui tawh state Tripura tlawhin, state department hrang hranga hotute an kawm a; an buh lei dan system an zirchiang a, paddy procurement centre leh rice mill an tlawh bawk.