Leiminin a hnawl ruang hmu

May 28 zinga leiminin a hnawl zing ami Deborah Lallawmawmi (11) d/o R Lalmuanzova, Hlimen ruang chu June 4 chhun khan hmuh a ni.
Thawhlehni chawhma dar 10.00 vel khan Serlui Lungleng kaiah ruang hmuh a ni a, tunhnaia leiminin a hnawl avanga nunna chan zing ami Deborah Lallawmawmi ruang a nih rin a ni naa, a ni lo tih finfiah zui a ni. Ruang hi a chiat deuh tawh avangin hmeichhe naupang a ni ngei em tih pawh finfiah a har a, he chhiatnaa tel hnamdang, an hriat lem loh te pawh ni theia ngaih a ni.
Hetihlai hian Thawhlehni tlai dar 5.00 vel khan leiminin a hnawlna hmun Hlimenah Deborah-i ruang nia hriat hi hmuh a ni a, darkar khat hnu velah lakchhuah niin, amah a ni ngei tih finfiah a ni a. Post mortem examination tih niin, he chhiatnaa thi a nu leh pa bula zalh turin Zobawk Lunglei lamah phurh a ni.
May 28-a chhiatnaa ruang la hmuh loh te hi ni sarih chhung zawn a nih hnu in, Mizo danin a nawlpuia zawn chu June 3 khan tihtawp a ni a. Heti chung hian mi engemawzat chu ruang zawng hian an la thawkchhuak reng a. Deborah tih loh hi midang pali ruang hmuh a la ni lo.