Leitlangpui Music Festival

Tourism Minister Lalrinpuii chuan Anthurium Festival tihtawp a nih tur thu leh a aiah Leitlangpui Music Festival hman a nih tawh tur thu tunhnai khan a sawi a. Minister hian Anthurium Festival hi mipuiin an ngaihlu tawk lo nia an hriat thu a sawi bawk.
Kan hriat angin sawrkar laipui chuan India ram economy chawikan nan tourism promote-na lam hawia hma la turin state tin a hrilh a; chumi atan chuan khualzinte hip thei tur festival phuahchawp pahnih khat tal siam theuh turin a hrilh a, festival pakhat huaihawt nan cheng nuai 25 zel state tin hnenah a pe thin bawk a. Mizoram pawhin hemi atan hian Anthurium Festival leh Winter Festival a siam a. Anthurium Festival hi 2006 atanga hman tan kha niin, a hmun nghet atan Reiek hman a ni bawk a.
Anthurium Festival hian a tirah chuan mipui hlut a hlawh ve hle a, mahse festival siam a nih chhan ber ‘khualzinmite hipna tur’ tih chu a hlawhchham ti ila, kan sawi sual awm lo ve. Khualkzinmiten min hlutpui phak lohzia chu, minister-in ‘mipuiin an ngaihlu tawk lo nia hriat a ni’ tia a sawi dan atang hian a hriat mai awm e. Khualzinmite hip tura festival phauhchawp hian Mizoram mipui ngaihhlut takngial pawh a hlawh tawk lo tihna a ni.
Hetih lai hian, Arunachal Pradesh chuan Anthurium Festival kan neih atanga kum ruknaah Ziro Music Festival a siam ve tan a, anni chuan tun thleng hian an thatpui a, tourism promote-na tangkai takah an chhuah thei a, a kum telin programme pawh a lian chho zel niin a lang. Hetianga an kalpui theihna chhan nia lang ta chu, central atanga funding an hmuh cheng nuai 25 do let nan state-in budget-ah a crore tel he festival atan hian an dah thei niin hriat a ni. Nagaland Hornbill Festival hi chu sawi ngai lova hriat chian sa a ni.
Tuna Anthurium Festival thlakna atana Leitlangpui Music Festival ruahmanna kal mek pawh hi, a hming emaw, a hmun emaw thlak hi tourist hipna tha zawk a nihna tur awm chuangin a lang lova, chutih rualin huaihawt a nih dan hi a pawimawh lai ber chu niin a lang. Chuta tan chuan state sawrkar pawhin central funding ringawta innghat lova, state budget-ah pawh festival hleitling tak huaihawtna tham dah ve hi tourism promote nan chuan a pawimawh tih thenawm state dangte hmalak dan atang hian a langchiang hle a ni.
Tourism hmanga sum hailuh theihna potential nei tha anga kan insawi ang hu hian, he lamah hian hma kan la la na tawk lo niin a lang a, sawrkar hian tourim promote nan hian hei aia nasaa investment a siam a pawimawh hle a ni.