Infiammi hlawh hnem ber Cristiano Ronaldo

Infiammi hlawh hnem ber
Cristiano Ronaldo
Awmze neia infiammi lar zualte sum hailuh zirchianga kumtina list thar tarchhuak thin business magazine lar Forbes chuan an list thar tichhuakin, Cristiano Ronaldo chu a tum lina atan an chhui chin kum khat chhunga infiammi sum lalut hnem berah an puang leh ta a, golf khel thiam Jon Rahm chuan a dawt.
Saudi Arabian football club Al Nassr a zawm hnu khan Ronaldo hi nikumah pawh Forbes list-a sang ber a lo ni tawh a; tunhnai thla 12 liamta chhunga a sum huiluh an zirchiannaah Portugal forward hian US dollar maktaduai 260 (£205m) lalutin an ngai a, kum hmasaa a hlawh zat US dollar maktaduai 136 (£108.7m) aiin a lo pung leh hman hle tawh a ni!
Khelmual leh a chhehvela Ronaldo elpui kumhlun Lionel Messi chuan sum tamna Arab ram pan ve duh loin America lamah hun a hmang a, a sum lakluh pawh kum 30 mi Ronaldo angin a pung ve thur thur lo a ni mai thei a, tuntum list tharah hian pathumna a ni daih!
Messi hmakhalhtu Spanish golfer Rahm pawh hi Arab hausakna par tlantu a lo ni ve tho a, Saudi-funded LIV Golf tour lama a insawn hnuah kum khat liamta chhunga a sum lakluh an chhutsak danin US dollar maktaduai 218m (£172m) a kai chho dawrh!
Footballer pahnih Neymar leh Karim Benzema-te pawhin top 10 an la luah ve hram hram chhan chu Saudi Pro League an pan vang a tih theih ang!
List-a pangana luahtu Giannis Antetokounmpo chu basketball star dang pahnih LeBron James (palina) leh Stephen Curry (pakuana)-te nen sum lalut tam 10 zingah an lang pha a; American football quarterback Lamar Jackson chu 10-na a ni.
Forbes tarlan danin, tuntuma khawvela infiammi hlawh tam zual 10-te kum khat sum lakluh belhkhawm hi chhiah leh agent hlawh an pek hmain US dollar vaibelchhe 1.38 (£1.06bn) tehreng a tling a, chu chu Forbes list top 10-te hlawh an belhkhawm tawh china la tam ber a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More