Police-in Bungthuam tualthahnaa inhnamhnawih an man kim tawh

On Feb 25, 2025 13 0

Police-in Bungthuam tualthahnaa
inhnamhnawih an man kim tawh
Mamit district Bungthuam khuaa tualthihna kaihhnawihah mi pasarih chu police-in an man tawh a, heti hian he tualthihnaa inhnamhnawih chu an man kimah an inngai.
Mamit SP Pukhraj Kamal chuan Thawhtanni khan Mamita thuthar thehdarhtute hnenah hemi chungchang hi a sawi a. Lalfakmawia nupui Sondorung Reang (27) chuan February 12 zan khan a pasal hi a bike (Royal Enfield) leh sumfai Rs 170000 vel kengin a chhuak a, a tuk thleng a haw tak loh avangin khawtlang hruaitute hnenah February 13 chawhma lam khan a report a ni.
Khawtlang hruaitute hian zawn dan tur an rel mek laiin hemi ni chawhnu lamah a ruang hi Bungthuam leh Luimawi inkar Kobawi luiah tshirt leh underpant chauh ha in hmuh a ni a. A nghawngah gamcha-a insuih a, a tukhum lamah thil sakhata chhutna nia ngaih hmun 5-ah a awm. Lalfakmawia bike leh thawmhnaw hi a ruang hmuhna atanga km.7 vel Thinghlun road-ah hmuh zui niin, he thihna hnuchhuina atana tangkai tur thildang pawh police-ten an chhui ta a ni.
Kanhmun Police Station hriattir an ni a. Mi kut tuar nia a lan avangin thubuai ziahluh a ni. He tualthihnaah hian a nupui Sondorung leh Lalfakmawia thian hnai tak Ramnunmawia remruatna hnuaiah midang rawih belha chet lak a ni tih an hnuchhuina atangin a lang ta tih SP hian a sawi.
Police-in an man mi 7 hi – Sondorung Reang (27) Bungthuam; Ramnunmawia (39) Bungthuam; Ajit Kumar Reang (35) Assam; Bimal Reang (60) Bungthuam; Banik Reang (35) Assam; Kochomoni Reang (26) Assam leh Khirud Reang (28) Assam an ni. A hnuhnung lam pathum hi February 23 zinga man an ni.
Luia Lalfakmawia ruang paihna atana an hman auto rickshaw chu chhui zui mek a ni a. An mi mante hi thu zawhfiah tur zawhfel an nih hnuah District Jail-a dah luh an ni dawn tih SP hian a sawi a ni.