Lengpui Airport-a harsatna sutkian sak turin DGCA ngen

Lengpui Airport-a thlawhna tumna lama harsatna la awmte sutkian sak turin Director General Civil Aviation hnenah thlen a ni.
Mizoram MP K Vanlalvena leh GAD Aviation principal consultant Wg.Cdr. J.Lalhmingliana te chuan Thawhtanni khan Civil Aviation DG nen Lengpui Airport-a airlines service leh airport hman tangkai dan an sawikhawm a. Lengpui Airport-a thlawhna a tum hi hmar lam atanga runway-ah tumin, hmar lam hawi zawng bawka thlawh chhuah chauh phalsak a ni a, hmar lama khua a chhiat changin thlawhna a tum theih loh phah thin. Hei hian thlawhna service leh a passenger-te harsatna a thlen thin avangin, a rem lam lam atanga tum theih turin ngenna an thlen a. A rang thei ang bera tihhlawhtlin a nih theihna’n DGCA official-ten a rang thei ang bera Lengpui Airport tlawh turin Aizawl rawn kal an tum tih an sawi.
Lengpui Airport hi Table – Top Airport anga puan a nih avangin ambulance thlawhna tum tur reng reng khalhtu pilot-te chu a hmaa pilot instructor-in a lo clear lawk tawh an nih loh chuan tum phal an ni loa. Hei hian damlo phur thlawhna lo lut turte tan harsatna a thlen thin. He khuahkhirhna hi awm tawhlo turin ngenna thlen a ni a, an ngenna hi a hma thei ang berin DGCA chuan tihlawhtling turin hma lak a lo tiam a ni.
Lengpui Airport runway lights chu visibility a that tawk loh laiin chhunah pawh hman a ngai thin a. Tuna vuah mek runway lights chu a that tawk loh avangin a aia tha zawk, thim thut thut leh khawchhiat lai pawha hman tlak turin state sawrkar hmalakna chu a rang thei ang bera clearance pe turin Civil Aviation hotute Aizawl-ah an lokal dawn a ni.
Heng thu thlen hi tih hlawhtlin a nih chuan Lengpui Airport-a ambulance thlawhna tum tur reng rengin harsatna nei tawh loin, khawchhiat avanga thlawhna tum theih loh (diversion) awm tawh ngailo tura beisei a ni tih sawi a ni.