Lengpui Airport sum hmuh tur zat hmu \ep tawh

Sorkar kum kal lai 2024-25 chhunga Lengpui Airport-in sum a hmuh tur bituk zat a thawkchhuak hnai.
General Administration Department (GAD) hnuaia Civil Aviation Wing atanga thu dawn danin, April 2024 atanga tun thlengin Lengpui Airport atanga sorkara sum lut tawh zat chu Rs 13,44,17,180 a ni.
2024-25 chhunga sum hmuh tura bituk hi cheng nuai 1795 a ni a, cheng nuai 1344 chuang an hmu tawh. 2024-25 hi March thlaa tawp tur a ni a, thla hnih a la awm.
Sum hmuhna hnar lian ber chu Usher Development Fee (UDF) leh Aviation Security Fee (ASF) te a ni a, hetah hian cheng nuai 1000 hmuh tawh a ni. Rental Charges te, Display Hoarding leh Lengpui Airport-a Parking Fee an lakte atangin sum hmuh a ni bawk.
Sorkarin 2024-2025 chhunga Lengpui Airport leh helicopter chuan man atanga sum hmuh tur a bituk chu cheng nuai 1795 a ni a, Lengpui Airport leh helicopter chuan man atanga sum an hmuh zawng zawng hi cheng nuai 1558 a tling tawh. An target atanga sum an la hmuh tur hi cheng 236 chuang a ni.
Lengpui Airport-ah hian khualzin an pung zel a, ni tinin Lengpui Airporta rawn lut mi 700 leh hmun dang pana thlawk chhuak mi 700 vel an awm anga chawhrual theih niin, ni tinin mi 1400 vel khualzin an awm ziah ang a ni.
Manipura tualchhung buaina chhuak avangin khualzin lut chhuak hi an pung a, Manipur-a Zo hnahthlakte awmnaa mite’n Imphal Airport an hman ve tak loh avangin Lengpui Airport hi an hmang thin.