Lengpuia NIT campus tur
forest clearance fel hnai
Mizoram Rajya Sabha MP K Vanlalvena chuan Pathianni khan New Delhi-ah Union Minister of Environment, Forest & Climate Change Bhupender Yadav chu a chenna inah hmu in Lengpuia National Institute of Technology campus dinna kawnga harsatna tawh mekte tawngka leh ziakin a thlen.
Lengpuia NIT campus nghet dinna tur hian 2020 January khan Union Cabinet meeting chuan cheng vaibelchhe 669.75 a sanction tawh a. Cheng vaibelchhe 334.78 hmanral a nih tawh hnu ah Riverine Reserve Forest a ni, tia Forest department-in complaint a thehluh avangin hnathawh kal zawng zawng tihtawp vek a ni a. Sum sanction tawh atangin vbch. 334.97 hman chhunzawm theih lohin a la tang reng a ni.
Union minister hian NIT campus harsatna hi Mizoram Forest minister TJ Lalnuntluanga leh Higher & Technical Education minister Dr R Lalthangliana nen pawh an sawi dun tawh tih sawiin, April thla chhungin forest clearance tihfel a ni ang tih Mizoram MP hi a lo hrilh a. Union Forest, Environment secretary chu telephone-a be nghalin, NIT Mizoram harsatna sutkian hna chu ngaihpawimawh hmasaka nei turin a hrilh a ni.
Rajya Sabha MP hi NIT Mizoram registrar Dr Lalthanchami Sailo chuan a tawiawm a ni.
NIT zirlai, state dang atanga Mizoram pantu tam takte bakah Mizoram hmun hrang hrang atanga Mizo zirlaite hian Chaltlang leh Durtlangah te mimal in an la luah mek a ni.
Lengpuia NIT campus tur forest clearance fel hnai
Get real time updates directly on you device, subscribe now.
Prev Post