Shiv Sena (UBT) leader Sanjay Raut chuan Prime Minister Narendra Modi chuan a academic qualification chu phochhuak se, eng nge thup tur awm tiin a sawi.
Rajya Sabha member chuan PM degree chu Parliament building luhnaah tarchhuah ni se a ti a. Ram pumin a education qualification chu an hriat ngei a ngai a ni, tiin a sawi bawk.
Raut chuan, “Narendra Modi hian railway platform-ah thingpui a zuar thin a, Political Science-ah MA a ni a. A degree hi chhinchhiahtlak leh revolutionary deuh mai a ni a. A degree hi Prime Minister Narendra Modi sak ngei Parliament building thara luhnaah tar ni se,” a ti bawk a.
“Parliament leh ram pum hian a education qualification hi hria se la. Eng nge zep tur awm a, eng nge zep ngai,” tiin a sawi bawk.
PM degree a lem tia sawi chungchangah Raut chuan, “Prime Minister ber hian a degree chu lailang mai se la. A degree certificate chu Union Minister Amit Shah ngeiin a pholang hmasa ber tawh a lawm,” tiin a sawi a.
Delhi CM Arvind Kejriwal chuan PM Modi degree chungchangah hian zawhna a nei a, mahse, Gujarat court chuan Rs 25,000 a chawitir hlauh thung tiin Shiv Sena (UBT) thupuangtu chuan a sawi bawk a.
“Ram president, High Court/Supreme Court judge leh keimahni degree te pawh demand a nih laiin eng vangin nge prime minister educational qualification chu thup tlat a nih? PM Modi hian rawn tichiang ngei rawh se,” tiin Raut chuan a sawi bawk a.
Raut chuan Bharatiya Janata Party leader te chuan ‘suak’ degree an nei deuh vek a ti a. “Degree suak factory an ni a, in hre vek. An hming lamchhuak ula an degree enfiah teh u,” tiin zawhna chhang bawk.
PM degree chungchang chu Parliament-a Adani group issue lak pen tumna a ni em tia sawi chungchangah Raut chuan, “Gautam Adani issue hi a la tawp hauh lo. Kan leader Uddhav Thackeray pawhin a sawi lang a, Pathianni pawh khan Maharashtra a Chhatrapati Sambhajinagar rally a neihnaah a la sawi lang a ni,” tiin a sawi bawk.
Gujarat court-in PM Modi degree kimchang a phut avangin Delhi CM Kejriwal chu pawisa a chawitir hnuah a langsar leh a. PM Modi degree kimchang hriat duh avangin eng nge chawi leh dan bawhchhiatna? tiin Raut chuan zawhna a zawt bawk.
‘Modi surname’ chungchang a sawi avanga Lok Sabha atanga bantir mek Congress leader Rahul Gandhi chu thlawp bawkin Raut chuan, “Rahul Gandhi disqualification hi a suak bawk a ni. Gujarat a court sang zawkin Rahul Gandhi dikna a hailan ka beisei,” tiin Raut chuan a sawi bawk.
Tun hnaia ram chhung hmun hrang hranga tharum thawhna thlengah Raut chuan, “BJP te hian ram chhungah buaina siam turin wing thar an siam a. Hetianga buaina nasa zawk chawhchhuah hi inthlanpui leh inthlan zawh tawh hnuah siam an tum a ni. Hooghly emaw Howrah a buaina chawkchhuaktute kha tu te nge? Maharashtra a buaina chawkchhuak tute hi tu te nge?” tiin zawhna a siam bawk a.
“West Bengal-a buaina siam hi BJP te hmalakna a ni a, kum 2024 Lok Sabha inthlan thlir rana an chetlakna a ni a. Politics a hamthat nan constituency thenkhat an thlur bing a ni. Heng state te hi BJP tena thuneihna an chanlohna zel niin tumbik nei thlapa an chet lakna a ni,” tiin a sawi bawk.
Maharashtra-a Eknath Shinde sorkar chu sawisel bawkin, “Maharashtra-a Shinde camp-BJP sorkar hi a chak lovin mipui lawm an hlawh lo hle a. Tlawm thakin an awm dawn tih an hriaa chuvangin buaina an chawk chhuak char char a ni. Karnataka pawh inthlan mai tur an ni a, BJP ten West Bengal-ah chakna an chang dawn lo bawk a. BJP tena politics a hlohna an neih dawn apiangin tharumthawhna a chhuak thin,” tiin Rajya Sabha member chuan a sawi a ni.
Raut an PM Modi certificate phut zui
Get real time updates directly on you device, subscribe now.