LESDE MBBA Inter Veng 2005A thiam pariat zingah Khatla ‘S’ leh Kanan veng tel lo!
LESDE MBBA Inter Veng 2005
A thiam pariat zingah Khatla ‘S’ leh Kanan veng tel lo!
Lesde MBBA Inter Veng 2025 khelh mekah an game hmasa bera team tha Ramhlun North beiseina thaibo nghal theitu Kanan in quarter finals an thleng zo lova; Mizoram basketball che vel chhehvel hre ber pawl Dennis-a kaihhruai Khatla South in tawnhriat ngah Nuna enkawl Dawrpui Vengthar an hneh lo – a mak!
He result pahnih hian inelna nunrawnzia leh sawi lawk theih a nih lohzia a tarlang nawn!
Kanan leh Khatla South, phawtsss
July ni 11, inrinni khan R. Dengthuama Indoor Stadium pan nal nal chhan tlak thiau inkhel en tur awm zingah Kanan leh Nursery veng inkhel a awm a – London boys (Nursery veng) hma ah Rozama, Nûna, Fma leh chuai thei lo Liama te an tlawm – ni lo, an khelh chhiat ni tawngtu Kanan veng an zawr!
He inkhelah hian Emmanuel-a a langsar fal leh nalh a, inkhel tangulh zet karah he player class san zia hi tarlan nawn a ni!
Nursery team enkawltu Albert-an champion kawng an zawh zui zel dawn chuan ‘the three brothers’ – Hriatpuia, Sangsanga leh Tetea te unau anga dam dup (cool) thei reng turin a player-te a thunun a ngai!
Tunhnaia veng/khua intihsiaknaa champion nomawi nena sawi zawm theih deuh reng khawpa tha, Khatla South tlak thu hi an vengchhunga basketball meichher chhi alhtu te mittui titla tamtu a ni dawn sa!
Tun inelnaa khel tha ‘bawn’ Dede-a sirah rawlthar tha za, rising star Tuaia khel kha ennawn leh tham a ni – a taimak zia, ran zia leh that zia kha aw!
A player-te remkhawm fuhtu Nuna tan Mpa a rintlak hle bawk.
Chak lo zawk Khatla South tan player hriathlawh Gospel-a, Michael-a leh Rinzuala te kiangah MSL star player ni phak Ropuia leh Hmachhuana te an awm a, an hming hmaa J dah that ho te leh rawlthar rualte khan vanduaina hi vanneihna kiangah a inlar ve thin tih hre nawn se, he veng hi thawnthu thar nen rawn inlan leh rawh se.
Mizorama basketball a veng anga tuichilh pawl ber South Side hi chawi nung leh turin Pu De-a leh Raymond-a te hian chona an tlan san tawp lovang!
Quarter finals thlirlawk zuai
Tuikual South hi tun inelnaa hnehna chang hmasa ber ni in, Tyson-a enkawl team hian point 97 zet match khatah an score thei a – anni aia point nei sang an la awm lo!
College veng, Zuangtui leh Khatla East te an lo hneh tawh a; an elpui tur Chawnpui hian Luangmual, Chanmari leh Ramhlun Venglai te an lo paltlang tawh bawk.
Tuikual North hian Zonuam, Republic leh Hunthar te an lo tlawm tawh a; an elpui tur Nursery veng hian Saron, Mission Veng leh Kanan hma ah champion an tum zia an lo tilang tawh bawk.
July ni 12, Inrinni inkhel result
Hunthar 63-73 Tuikual North
Nursery 81-71 Kanan
Dawrpui Vengthar 77-72 Khatla South
Ramthar 87-65 Champhai Vengthlang
Bungkawn 73-51 Electric
Bawngkawn 58-79 Zarkawt
Quarter Finals, zanin inkhel turte:
Tuikual South vs Chawnpui – 6 pm
Tuikual North vs Nursery – 8:30 pm