Leukemia sign hriat tur
Leukemia an ti a, thisen cancer kan ti mai a, a lanchhuah dan hi thil ho deuh ni a kan ngaih te a nih thin avangin kan inhrechhuak lawk lo thin. Tun tumah hian Times of India health section-in leukemia sign hriat tur pawimawh ni a an sawi te kan rawn tarlang e.
1. Zan mut that loh sawi tur pawh awm chuang lo a chau leh zawi deuh ngawih ngawih a awm thin chuan in-check a tha. Hei hi red blood cell thlakchhamna, anemia vang pawh a ni duh hle.
2. Thaw chham deuh lek lekin i awm fo em. I chauin i zawi riau a, chutah thawchham lek lek ten i awm thin a. In chung lawn tura step pahnih khat han kal ringawt pawhin i thawk a chham lek lek zel mai a nih chuan leukemia sign a ni thei a, inentir a tha.
3. I pang kha a duk hma riau em? A chhan hriat tur pawh awm si loin i pang duk a awm leh ringawt thin em? Intauh leh intihfuh pawh awm si lo a duk leh ringawt thin hi thisen cancer cell vang a ni thei a, platelet count tlem emaw clotting lama dik lo eng emaw awm vang te pawh a ni thei. Duk chu taksa hmun hrang hrangah a awm thei a, a bikin ban leh ke-ah a awm duh lehzual.
4. Hahni vûng hi ka chhung hrisel loh vang a ni vek chuang lo. I hahni a lo vung a nih chuan gingival hyperplasia an ti a, hetiang acute leukemia-ah a awm fo thin.
5. I pum a puar deuh ul-in i hre thin em? La (spleen) vûng hi leukemia sign a ni thei a, la a vûn chuan chaw ei a tui lo a, thil ei chakna te a bo a, la vûng chuan pum a tipuar thin.
6. Khawsik deuh ser ser i nei ngun riau em? Khawsik fo mai chu infection leh taksain natna a do theihna chak lohna vang a ni thin a, thisen cancer cell nen pawh inzawmna a nei thei. Nidang zawng aia khawsik i nei ngun riau a nih chuan doctor pan a tha.
7. I zan mu i thlanin a lo bual leh vak mai thin che a nih chuan doctor i rawn dawn nia. Zan mutnaa thlanin min bual vak mai hi thil eng emaw dik lo a awm tihna a ni a, leukemia kaihhnawih infection vang te pawh a ni thei.
8. I lu a na ngut ngut thin em? Lu na hi rilru hah leh ngaihtuahna hman nasat vang chauhin a awm lo a nia. I lu a na ngun riau a, i hnar te a thi fo a nih chuan leukemia sign a ni thei.