Library pan chakawma siam…

Art & Culture Minister Pu R. Lalzirliana chuan puitling bakah thalaite leh naupangte tan library te chu kal chakawm a nih theih nan tan lak thar tul a tih thu leh, computer thiamna leh library te chu a indo zawng ni lova kalkawptir tha a tih thu a sawi a. He thu hi nimina state level library seminar & training a hmanpuinaah a sawi a ni.
Minister thusawi hi tun laia kan mamawh lian em em mai a ni. Thiamna puakchhuahna bul ber chu lehkhabu hi a ni, kan ti a; hei hi englai pawhin a dik a, a dik zel bawk ang.
Thiamna lo sang zelah internet kaltlangin mobile phone leh computer atangtein eng eng emaw hi chu thu leh hla hriat zung zung theih a lo ni ta a. Tunhmaa lehkhabu tam tak chhiar chhuah atanga hriatna tha tak tak kan lakkhawm ang kha, second hnih khat lek chhungin duhna lai lai a zawn chhuah zung zung theih a, kan hriat duh laite chauh awlsam taka hmuh zung zung theih a lo nih takah chuan, lehkhabu chhiar kher lovin internet chu innghah nan bera hman kan lo ching ta hle a. Rang tak leh awlsam taka electronic khawl hmanga kan hriat duh kan hriat zung zung theih laiin, thil dang (lehkhabu kan chhiara kan hriat zawng zawng ang kha) kan hre tel ta thin lova, hre zung zung thei kha, kan hriatna a zim ta hle thung a. Innghah nana internet hmang thinte chuan lehkhabu chhiar atanga finna neih thin ang kha an nei pha tawh lo va, internet awm lohna hmunah an buai mai a, thiamna leh hriatna tluantling an nei pha lo thin a ni.
Hei hi tun laia thalai tam tak dinhmun mek a ni. Lehkhabu chhiar uar tura tan lak hi chhungkua atangin a sak talh tawh a, pawl leh institution atanga discipline khauh deuh nena innawr kal hi chu kan mamawh tawh niin a lang.
Chutih rualin, A&C minister-in a sawi pawimawh em em chu, ‘library pan chakawma siam’ tih hi a ni a, hei hi a bikin khawpuiah a pawimawh lehzual awm e. Tin, computer thiamna leh library kalkawptir chungchangah pawh hian, digitization hmangin zau takin hma a lak theih bawk dawn a. ‘Lehkhabu chhiar tam a tha, a pawimawh’ tia thua infuih liam mai lo hian, hmasawnna danglam zel mila kan chhawpchhuah thiam a, pan chakawma siam thiam hi a pawimawh tawh hle a; hei pawh hi sawi liam mai lova, a taka bawhzui chat a pawimawh dawn hle a ni.