Lipulekh pass-ah India leh China sumdawnna kalpui leh tan

Indian sumdawng 26-te chuan Zirtawpni hian Lipulekh pass kaltlangin Chinese ram awp chin, tibet-ah an luh beisei a ni a, hei hi kum ruk chhung helai ramri inkalpawhnaa sumdawnna tihtawp a nih hnua tan thar lehna a ni.
Uttarakhand-a Dharchula trade officer, sub-divisional magistrate (SDM) ni bawk, Ashish Joshi-a chuan trade pass 26 pek chhuah a nih tawh thu sawiin heng mite hi sumdawng 17 leh anmahni puitu pakua an ni a. Sumdawnna leh inpawhna kalpui awlsam zawk nan Gunji-ah customs office hawn a ni bawk.
“Indian sumdawng kal chhuak hmasa berte hian Zirtawpni hian tibet an thleng kan beisei a, Lipulekh pass bula khaw hrang hranga kudamah an bungrua an dahkhawm tawh a ni,” tiin Joshi-a chuan a sawi.
Sorkar hian sumdawng 103 chuang hnen atangin sumdawn leh ramri kân phalna dilna a dawng tawh a, tunah hian sumdawng 25 awmna batch hnihna atan trade pass pek chhuah a tumin a buaipui mek bawk.
Sumdawngte pui turin sorkar chuan Nabhidhang bulah Lipulekh pass-a bungrua phurh an theih nan sabengtung leh sakawr awmna tur hmun a siam a, hei hi a hmun atanga metre 600 vel chauhva hlaah a awm a ni.
Indo-China ramria insumdawn tawnna hi kum 1991 khan tan ni mah se, Covid-19 leng vangin kum 2020 khan tihtawp a ni.
Dharchula-a Bharat-Cheen Vyapar Samiti President Jeewan Singh Rongkali chuan sumdawng lo kir lehte hian bungraw phurh kualna lamah harsatna an tawk nghal tih a sawi.
“tibetan mart kan thlen veleh kan thil ngaih pawimawh ber chu kum ruk kaltaa kan bungraw dahkhawmte dinhmun enfiah a ni a, chhiatna thlengte kan zirchian hnuah chauh sorkarah chhawmdawlna kan dil ang a, chu chuan dahkhawl a tlai vanga chhiatna kan tawhte phuhrukna tur a pui ang,” tiin Rongkali chuan a sawi.