Lir a nghin reng vangin Santorini-ah emergency puang ta
Ni eng emaw zat chhung Greek thliarkar, Santorini-a lir a nghin hnuah emergency puan a ni ta.
Nilaini zan dar 9:09 (India-a Ningani zing dar 12:49)khan magnitude 5.2-a nain Greek thliarkar, Amorgos leh Santorini inkarah a nghing a, hei hi tun hnai nghinga a nat ber tum a ni a. Lei hnuai km 5 vela thuk atanga intan a ni.
Lirnghing hi March 3 vel thleng la awm tura ngaih niin ‘rikrum a awma buaina lian a awm loh nan leh chet vel a awlsam nan’ tiin emergency an puang ta tih thuneituten an sawi.
Santorini hi mi 11,000 chuangin an chhuahsan phah tawh a, mi 7,000 velin lawnga chhuahsanin mi 4,000 vel thlawhnain an chhuak.
Amorgos chhimthlang lamah magnitude 4.7-in Ningani zing dar 07:50-ah a nghing bawk a, hei hi a hma zanlai atangin zing dar 6:30 inkarah vawi 57 a nghing bawk.
Thil tihchhiat liamtham erawh a la awm lo va; mahse, thuneitute chuan inralrin a tul thu leh a na zawk a thlen pawha buaina a awm lohna turin ruahmanna an siam.
Geodynamic Institute Director Vasilis Karastathis chuan ‘lirnghing hi tuna a nat zawng ang vel hian ni eng emaw zat a la nghing dawn’ tih ERTNews hnenah a sawi.
Santorini hian kum tin tlawhtu maktaduai tel a nei ziah a, tun lai hi a tlem lai niin tual chhung mi tam tak chu lirnghing avang hian an inthiar chhuak rih bawk.
Khaw awm danin a zir loh rih avangin Santorini leh Athens bula Piraeus lawngchawlhna inkara lawng kal a awm rih lo va. Khaw awm dan tha lo hi ni eng emaw zat la awh tura ngaih a ni.
Santorini-a lawngchawlhnaah chuan mi tam takin emergency ferry-a chuan tumin an la nghal.
Naxos thliarkar atangin kang thelhtu leh damdawi thiamte tirh luh an ni tawh a. Damdawi ina thawkte pawh inringin chawlh hmangte pawh an ko kir.
Ambulance unit-te pawh thliarkarah hian tirh luh an ni a, sipai pawh luhtir tura rin a ni.
Lir a nghin reng vangin Santorini-ah emergency puang ta
Get real time updates directly on you device, subscribe now.