South-east Turkey-a lirnghing rapthlak taka dam khawchhuak te zawn hna chu theihtawp chhuaha beih a ni chungin ruahsur nasa leh vur tla nasain harsatna a siam nasa hle.
-- Advertisement --
Lirnghing avanga nunna chan 5,000 chuang an awm tawh a, hliam tuar 15,000 chuang awmin World Health Organization chuan nunna chan te hi an la pun belh theih thu an sawi bawk a.
Seismologists te chuan Turkey a lirnghing record tawh zinga na ber pawl tiin an sawi a, Turkey bikah hian mi 3,381 chuangin nunna an chan tawh a, lirnghing hian minute hnih chuang a nuai niin sawi a ni bawk.
Building tihchhiat 4,700 vel atangin mi 8,000 chuang chhanchhuahin a awm tawh niin Turkey’s Disaster and Emergency Management Authority (AFAD) chuan a sawi a.
Aftershock a thleng zui reng bawk a, rescuers te chuan kut lawng tein hnamhnawk paihin dam khawchhuak zawngin hma an la a. Khawvawt lutuk chuan harsatna a thlen nasa thung.
Chhim lama Hatay province-ah chuan min tanpui ru tia hmeichhe aw an hria a, mahse, tanpui ngaihna a awm si lo a ni. Min chhan rawh u ti lawm lawm te pawh chhan theihin an awm tlat lo a ni.
Lirnghing na takin a nuai te chu pawnah khawvawt tak hnuaiah an awm a, mi tam ber te chuan an in chhung an lut ngam rih lo, lirnghing sawi avanga an thlabarna chu a turu em avangin an chenna in pawh an la lut ngam ngang lo a ni.
Khawvel ram hrang hrang ten tanpuina an thawn lut a, Turkey President Recep Tayyip Erdogan chuan ram hrang hrang 45 in tanpuina pek an inhuam thu an hrilh tawh thu a sawi a.
UN Secretary General Antonio Guterres chuan khawvel ram te chu tanpuina pe tura ngenin chhiatna thleng chuan humanitarian aid lamah mamawhna sang tak a thlen an ti bawk.
European Union chuan Turkey-ah hian search and rescue team a tir lut a, Netherlands leh Romania te pawhin tanpuina pein UK chuan specialist 76 leh hmanrua leh rescue dog te a tirh luh tur thu a sawi bawk.
France, Germany, Israel leh US te pawhin tanpuina an pek tur thu sawiin Russian President Vladimir Putin pawhin Turkey leh Syria te chu an puih tur thu sawiin Iran pawhin a puih tur thu a sawi bawk.
Thawhtanni zing lama Syrian ramri hnaih south-eastern Turkey a lirnghing avangin mi 4,300 chuangin nunna an chan tawh a. Lirnghing na zet mai niin Gaziantep khua chu a sawp hneh hle a, a hnuah pawh artershock a nghin hmasak ber tluka na a thleng zui bawk.
Eng vanga hlauhawm nge a nih?
7.8 magnitude laia na a ni a, lirnghing turu tih zinga chhiar tel niin Fault line 100km vela thui lai khawihin chu chuan a fault line hnaih vela building te chu a khawih na hle a ni.
Prof Joanna Faure Walker, head of the Institute for Risk and Disaster Reduction, University College London chuan, “Lirnghing na ber ber zingah pawh tuna lirnghing hi tun hnai kum 10 chhungah a tluka na pahnih chauh a awm a, a hma kum 10 nena chhutin pali chauh a awm,” tiin a sawi.
Lirnghing na tak chuan chhiatna a thlen ngawt a ni satliah lo va, a nghin hun chu zing lam hma tak mi tin te in chhunga awma an la mut lai a nih vang a ni a. Hei bakah hian building ngheh dan chuan awmzia a nei bawk.
Dr Carmen Solana, reader, volcanology and risk communication, University of Portsmouth chuan, “South Turkey leh a bik takin Syria ah lirnghing dawl zo thei tur infrastructure tha a awm tam lo hei vang hian nunna chhanhim nana theihtawp rang taka chhuah a ngai a. Darkar 24 chhung a pawimawh ber a, darkar 48 hnuah chuan chhanchhuah theih tur a tlahniam tawh,” tiin a sawi.
Helai region-ah hian kum 200 chhung vel chu lirnghing an tawng tawh ngai lo va, warning sign pawh a awm lo, hei vang hian region dang te ai daihin invenna lamah an hnufum bawk.
Lirnghing thlentu?
Earth’s crust hi bits hrang hrangin an siam niin chung te chu plates tih an ni a, insi rialin an awm hlawm. Heng plates te hian chet an tum thina mahse chu chu insi niai nuai an nih avangin an chetna tur an indal thin. A chang chuan plate pakhata neksawrna na tak che vel chuan pawn lam a tiche thin a ni.
Tun lirnghing hi Arabian plate chu hmar lamah Anatolian plate neka a chet vang a ni. Plate atanga innawhna awm te chu tun hma pawha lirnghinga chhiatna nasa ber ber thlentu a ni thin a ni.
Helai bial velah hian 13 August 1822 khan 7.4 magnitude in a nghing tawh a, Thawhtannia lirnghing kha chu 7.8 magnitude a ni thung.
Kum zabi 19 lai khan helai bial velah hian lirnghingin tihchhiat a nei teuh a, Aleppo bikah ringawt pawh nunna chan 7,000 an awm a, kum khat dawn aftershock a thleng zui bawk.
Tun lirnghingah pawh aftershock a thleng reng tawh a, scientists te chuan lirnghing a nat em avangin hun rei tak aftershock thleng thei a ni, an ti.
Lirnghing tehna?
Lirnghing te hi Moment Magnitude Scale (Mw) hmanga teh a ni a, tun hma chuan Richter scale hmanga teh a ni a, hei hi chu hlui tawh lutuka ngaih niin leh dik tawk tawh lova ngaih a ni.
Lirnghing nat lam hi fault line hlat lam leh a chet thui dan azira teh a ni a. 2.5 magnitude chu hriat mang loh a ni a, mahse, khawl hmang chuan hriat theih a ni thung a. 5 magnitude vel thleng chuan chhiatna tenau a thlen thei a. Tuna Turkish lirnghing hi chu 7.8 lai niin major earthquake anga ngaih niin tihchhiat pawh a nei nasa reng a ni. 8 magnitude chin chunglam chu rapthlak tia sawi tawh niin engkim deuhthaw tichhe thei a ni tawh.