Lirthei chesualnaah thi

On Nov 16, 2024 11 0

Lirthei chesualnaah thi
Tunhnaiah lirthei chetsualna a thleng chho reng a, nunna chan leh hliam an awm nual.
November 14 zan dar 11.30 vel khan Zemabawk Kawn Vengah scooter pakhat chu tipper hnuaiah tlanlutin scooter khalhtu T Lalhmangaihzauva (19) s/o T Lalchungnunga, Hrangchalkawn Lunglei, tuna Bawngkawna cheng mek chu a hmunah hian ka pawh chhawn lohin a thi.
Thudawn danin, T Lalhmangaihzauva hi Amawii Hero-a thawk, Bawngkawn-a hostel-a awm a ni a; lengchhuak ngai zen zen lo a ni a, Ningani zan khan lenchhuahna tur neiin, a thiante scooty a hawh a, Zemabawk Kawn Veng, dak in panna kawnah hian Thuampui lam pana amah tawk zawka tlan tipper hnuaiah hian a inrawlh lut ta a ni. Helai hmunah hian lirthei a lo chesual fo tawh nia sawi a ni.
Zirtawpni zing dar 6.40 vel khan Chhiahtlang Chhim Vengah Assam type in pakhat chu truck (Hyva) in a hnawl a, vanneihthlak takin he ina chengte hian hliam na tuar loin an him.
Thudawn danin truck hian in a sut chhiat hma hian plastic tuizem pakhat a sut darh bakah electric ban pakhat a su thlep vek a; in hi a su zui ta a ni. He in hi Lalremliana ta, Lalpandika te chhungkaw luah lai a ni a, a nupui leh an fa sen pahnih nena awm niin, hliam na tuar loin an chhuak a ni.
Tunkar Thawhlehni zan dar 9.00 vel khan Sateekah car pakhat (Ignis) chesualin a khalhtu nen mi panga chuang zingah a khalhtu Lalthazawnga (52) h/o Lalsangliani, Zemabawk North leh hnamdang pakhat an thi. Thudawn danin, Mumbai lam atanga damdawi company aiawha Mizorama rawn kal mi 4 chuan car rental khalhtu Lalthazawnga hi Lengpui Airport atanga Aizawl thlenna atan an hmang a, Aizawl atanga Lunglei kalna atan midang hmangin, Lalthazawnga hian Lungleiah hian a va lam leh a ni.
Thawhlehni khan Lunglei atanga Aizawl panin, Sateek-a kumin Cyclone Remal laia leiminna hmunah truck nen an inpelh laiin a thlang kawngah a tawlh liam ta nia sawi a ni. Car hi metre 100 dawnah a let thla a, Lalthazawnga bakah hian car-a chuang hnamdang pakhat an thi a, car-a cuang ve hnamdang pathum erawh hliam na tak an tuar lo nia hriat a ni.