Zoram Drivers’ Union (ZDU) chuan lirthei khalh fimkhurna hapta – Road Safety Week vawi 49-na an hmang tan a, Ningani khan Aizawl Traffic SP Stephen Lalrinawma’n Chaltlang Lily Venga ZDU pisa-ah a hawng.
Traffic SP chuan ZDU-in fimkhurna hapta a hmang thin chu a tangkai tih a sawi a. Lirtheia chetsualna avanga thihna thleng chu kumtin mi nuai 13 vel nia chhut a ni a, nitin mi 3287 thi ang an ni, tiin, lirtheia chetsualna titlem tura tan lak a ngai tih a sawi a ni.
India rama lirtheia chetsualna thleng thin zaa 75 chu a khalhtu fimkhur tawk loh vang a ni a, a dang zawng chu kawng that loh vang a ni tih a sawi. National Crime Record Bureau chhinchhiah danin, kum 2022 chhungin India ramah lirtheia chetsualna tum 461312 a thleng a, mi 168491-in nunna an chan phah.
“Hei vang hian lirthei khalhtute leh mipui kan fimkhur a ngai hle. Lirthei chetsual thin chhan zingah lirthei khalh laia phone hman, harhfim loa lirthei khalh leh mutthluk vangte a ni,” a ti.
Mizoram chu ram chhungah road discipline tha ber zing ami, national media pawhin an ngaihven hle tih Traffic SP hian a sawi rualin, dan thar hman a nih hnuah lirthei dan bawhchhia hremna a na hle a, sum tam tak chawi theihna a nih avangin dan bawhchhe lo tura fimkhur reng a tul tih a sawi.
Lirtheia chetsualna tam chhan zinga pakhat chu kawng that vang a ni bawk tih Stephen Lalrinawma hian sawiin, “Tunhnaiah Mizoramah inkalpawhna kawng siamthat leh siam mek a awm a, hengte hi siam zawh a nih chuan lirtheia chetsualna a tam thei a, kawng thaa tlan dan chin tawk thiam a pawimawh,” a ti.
Lirthei khalh fimkhur hapta
Get real time updates directly on you device, subscribe now.
Prev Post
Next Post