Lirthei khalhtuten himna ngaipawimawh turin chah

Lirthei khalhtuten himna
ngaipawimawh turin chah
Lirthei neitu leh khalhtuten kan himna tur ngaipawimawh a, dan zawm tha turin Transport minister TJ Lalnuntluanga chuan a sawi.
SEDP sum nuai 240 senga sak Serchhip District Transport Office building thar chu Thawhlehni khan
Transports minister hian a hawng a.
Minister chuan ram economy chu transport sector-ah a innghat thuk em avangin sawrkar pawhin a thuamtha zel a, hmasawnna awm zel vangin lirthei kan hmang uarin a nei thei kan tam deuh deuh a, lirtheia himna kan ngaihpawimawh a tul a, lirthei chetsualna leh chumi avanga chhiatna leh hloh kan neih chu a tamtham hle, tiin a sawi.
“Lirthei neitute leh khalh thinten dan ang taka kan lirthei kan enkawl a pawimawh a, dan hian kan himna tur min pein min kawhhmuh a ni. Himna lama hma kan sawn zel theihna’n Road Safety Month kan kalpui a, dan bawhchhetute man leh hremna atan chauha hmang loin; dan an zawm theih na’n lirthei neitute tanpuina hunah kan hmang tawh zawk a ni,” a ti. Serchhip DTO thawktute pawhin dan ang taka hna an thawh a, mipui tanpuitu an nih anga an tih tur tha taka an tih zel a beisei tih a sawi a ni.
Hun engemawchen atanga Serchhip-in DTO a nei chu mipuiin an awlsam phahin an tangkaipui a, a hmunhma pawh changtlung lehzual, lirthei tam tham tak dah theihna an nei leh ta, tiin, a hmunhma petu Darnam Veng chungah lawmthu a sawi a; a sak chhunga Darnam VC-ten an puih nasat avangin an lawm hle tih a sawi. A satu contractor-te pawhin an thawk tha hle nia a hriat thu a sawi bawk
Building thar hi chhawng thum niin, kawng an hnuaiah lirthei dahna tur floor a awm a, kawng an leh chumi chung chiah floor chu pisa atan hman a ni. Nuai 240 sengin CB Engineering-in a ni.