Lirthei luh lohna khua la awm hi a zahthlak – MBJP Gen Secy

Mizorama khaw tlemte awm si lirthei luh theih lohna khua ala awm chu thil zahthlak tak a ni tih BJP Mizoram general secretary Malsawm-tluanga chuan a sawi.

Kar kaltaa Mamit biala Booth Level Workers Meet a hmanpuinaah BJP State general secretary chuan kum 30 chuang state kan nih hnu ah pawh Mamit district khaw thenkhatah lirthei luh lohna ala awm chu zahthlak a tih thu sawiin, “State khata mihring cheng tlemte ni si, state sawrkarin min enkawl zo lo ringawt mai hi a mak a ni,” a ti.

Mizorama sawrkarna chelh tawh leh chelh mekten an minister nihna leh MLA nihnate a thlangtlingtu mipui hamthatna atan an hmang thinlo fo a ni tih a sawi a. Prime Minister scheme hrang hrang kaltlanga India mipui chawikanna chu kan phu mai niloin, kan chanvo tur a ni tih a sawi.

“Kumin MLA inthlanpui hi Mizoram tan a pawimawh hle. Mizoram hmabak, kawng thim nge kan zawh dawn a, kawng eng lam, development thlenna tur tih hi kan thlanchhuah turah a awm a, BJP kan thlan chuan hmasawnna kan thlang a ni a, party dang kan thlang a nih chuan vawiina kan dinhmun ang tho hi kan hmabak a ni leh dawn,” Malsawmtluanga hian a ti.

Sawrkar sikul hmingpu si a, zirna in mumal awm lo leh primary school SSA hnuai ami pawh hun rei tak class kal mumal tawh lo an awm tih a hriatin rilru a ti na tih sawiin, “Kan sawrkar hian enge a tih a, a ngaihtuah tih hi zawhnaa awm a ni. Hetiang harsatna, thingtlang mite tawrhna kan hmuh hian Mizoram thimna atanga enga hruai turin BJP chuan theihtawp chhuahin hma kan la zel dawn a ni,” BJP Mizoram hruaitu hian a ti.