Lirthei tela buhfai bukna dah thar

Muanna Veng Kudam-a Supply department-in SEDP sum hmanga buhfai phur lirtheite a buhfai chawpa bukna khawl, metric tonne 60 thleng buk theih digital weighbridge chu Inrinni khan Food, Civil Supplies & Consumer Affairs minister K. Lalrinliana’n a hawng.

Minister chuan digital weigh bridge hi a man tam lo mah se, ration buhfai semchhuah kawngah khawl pawimawh leh tangkai tak, hun leh tha tlem zawk senna tur buhfai bukna khawl a nih avangin khawl tangkai tak a ni dawn tih a sawi a. Weighbridge hman chu a hlui tawh avangin sawiselna tak tam a awm a, department chuan a thlakna tur hi SEDP kaltlangin a ruahman ta tih a sawi a ni.

Ration buhfai buk dik leh rang taka mipui hnena pek chhuah a nih theih nan FCS&CA department chuan truck chawpa buhfai bukna tha leh awlsam, digital weighbridge pahnih , GMG Zuangtui Aizawl leh PDC Luangmual Lungleiah a bun thar a. Hemi atan hian SEDP atangin cheng nuai 31.57 an dawng tih a sawi.

Tunhma in GMG Muanna Vengah hian weighbridge hman ani reng thin a, April 2020 atang khan weighbridge hi a chhiat avangin a hman zui theih ta loa, mamawhna avangin a thar dah a ni tih K Lalrinliana hian sawiin, “GMG Muanna Vengah hian a tirah digital weighbridge MT 60 dah tum a nih laiin, a hmunhma hi a chep deuh avang leh mamawhna a awm ve tho avangin weighbridge pakhat zawk hi PDC Luangmual Lunglei ah dah ve tura tih a ni ta zawk a, hei pawh hi bun fel a ni tawh a ni.

Digital weighbridge-te hi Leotronic Scale Pvt Ltd Amritsar Punjab supply a ni a. Weighbridge pahnih man hi Rs. 21,68,840 niin, a hmunhma buatsaih nan sum sen a ni bawk.