Liverpool-in Diaz dawrtu Bayern dawrna an hnawl

Liverpool-in Diaz dawrtu Bayern dawrna an hnawl
Anfield club-a a forward pui ve bawk Diogo Jota vuinaa kal loa an ram Colombia lama chawlh hmanga a intihlim lai social media lama a phochhuah avanga Liverpool fans leh Jota lainattute ngei hlawh chho ta hluai Colombia international Luis Diaz chu Bayern Munich lamin pound maktaduai 58.6-a lei an dil a, Reds hian an hnial fithla.
Tunthla tir lam pawh khan Bundesliga giants hian Liverpool forward hi lei an lo dil tawh a, kha mi tum khan Anfield club chuan zawrh lai a nih loh thuin an chhang a, Bavarians lam beidawng duh lo hian an sum tawktarh a la tlem deuha ngaiin an ngamna zat an pun chho a, chuti chung pawh chuan tunkar Thawhlehni khan an hlawhchham zui leh ta a ni.
January 2022-a Poto atanga an lakluh Diaz hi tunah kum 28 mi niin, Liverpool-ah hian kum 2027 nipui thawt lai thleng contract a la nei a; Arne Slot-a squad-a player pawimawh niin, hralhchhuah tur a nih rau rau chuan a ruai mektute hian a tlem berah pound maktaduai 87 lo chuan hralh an tum lo tih an sawichiang tawh a, German club hian Liverpool chhiar zat hi an phawrh mai ngam rih bik lo ni berin a lang – an hlawhchham chhan hi!
Season liamta khan club leh ram tan Diaz hian belhkhawmin goal 22 a thun tling a; Liverpool-in point 10 zeta chuanga Premier League title an lak theihna kawngah goal 13 a thawh tling ve bawk.
Nikum nipui insuan lai khan Diaz hi Manchester City pawhin an beisei a, Saudi Arabia lam atangin ngaisangtu a hmu nual bawk.
Liverpool lam hian striker an zawng mek tih hriat a ni a, tun dinhmuna an hel langsar ber chu Newcastle United thuam inbel mek Sweden international Alexander Isak hi a ni.
Premier League champion hian ni reilote hnuah Isak hi an thlung fel thei mai dawnin a lang a; he mi hnu hian centre-forward dang an target zui leh nghal dawn a ni.