Liverpool in final an lut

February 6, Ningani zan khan English Carabao Cup semi-final khelh zawh a ni ta a, Liverpool chuan Anfield-a an mikhual Tottenham Hotspurs chu 4-0 ngawtin an lo sawp a, Newcastle United hmachhawn turin final an lut. Reds hi trophy lian pali chawi kawp thei dinhmunah an ding mek a. Manager thar Arne Slot hnuaiah an khel tha hle.
Liverpool hi semi-final thawhkhatnaah Tottenham muala an len luh tumin an lo tlawm tawh a. An khingpuite hi si khat faiin an ngam lo. Mimualah an tlawm tawh vangin an mualah chak ngei an mamawh a. An mualah phu taka hnehna changin an khingpui an lehthal chiang hle a, phu takin final an lut.
Anfield-ah Liverpool in an khel tha viau naa goal erawh an thun thei mai bik lo. Darkar chanve chuang zet goal lut a awm theih loh hnuin minute 34-naah Gody Gakpo chuan Mohamed Salah siamsak atangin hmahruaina goal a thun a, mimuala an si phurh a sut zo. Gakpo goal thun hmang hian Reds in si khat faia hmahruai chungin chawlhlawk an hmang.
Chawlhlawk hmain khel tha tawk lo mah se chawlhlawk hnu lamah Liverpool an khel tha leh zual a, goal thum ngawt an thun belh. Second half tantirhte minute 51-na lekah Reds hian penalty an hmu. He penalty hi season kal meka khel tha tluang tak Mohamed Salah chuan a pet goal a, si belhkhawmah hma an hruai letna goal a thun.
An mualah si hnih faia hma an hruai hnuin Liverpool an khel tha chhunzawm a, an mualah inrintawkna sang tak leh phurna namen lo tak nen an inlan zui a, goal hnih an thu belh leh bawk. Liverpool tan hian season kal mekah midfielder langsasr ber pawl Dominik Szoboszlai chuan minute 75-naah an goal thumna a thun a. Hun tawp dawn hnaih minute 80-naah defender ropui Virgil van Dijk chuan Reds goal lina a thun belh zui leh bawk. Van Dijk goal thun hnuin goal dang a luh belh thei tawh lova Liverpool chuan an mikhual Tottenham Hotspurs chu 4-0 ngawtin an sawp zui ta a ni.
An mualah si li fai ngawta an chak vangin Liverpol hian semi-final-a an khingpui Tottenham Hotspurs chu si belhkhawmah 4-1 in an hneh a. Semi-final lehlamah 4-0 ngawta Arsenal hnehtu Newcastle United chu final-ah an hmachhawn zui leh ang. Champion lai Liverpool leh Newcastle United hian March ni 16, 2025 – Pathianni zan khian Wembley Stadium-ah final an khel dawn a. Inkhel hmuhnawm tak a nih ngei a rinawm.
Tarlan tawh angin Liverpool hi manager thar Arne Slot hnuaiah an khel tha viau a, trophy lian pali chawi thei dinhmunah an ding mek. EPL-ah vawi khata khel tlem zawk chungin point rukin hma an hruai mek a. Champions League-ah league champion niin last 16 an lut a, Carabao Cup final an luh tawh bakah FA Cup-ah champion thei dinhmunah an ding mek bawk. Trophy lian pali chawi tumin tan an khawh zui ngei ang.