England-a League Managers Association (LMA) chuan Premier League-a Manchester City champion puitu Pep Guardiola chu manager of the year-ah an thlang. Guardiola hian he chawimawina hi vawi thum a dawnna chiah a ni.
Manager ten manager tha an thlan turah hian thlan theih zingah Arsenal manager Mikel Arteta, Brighton chet thatpuitu Roberto de Zerbi champions league-a Newcastle United hruai thlengtu Eddie Howe, EPL a Burnley kaisan puitu Vincent Kompany leh Plymouth manager Steven Schumacher te chhawpchhuah an ni a. Pep Guadiola hian vote hmu sang berin chawimawina ngaihhlut hlawh a dawng ta a ni.
LMA manager of the year chawimawina hi Manchester United manager Sir Alex Ferguson khan vawi nga dawngin, he chawimawina dawng ngun ber a ni a. West Ham manager ni mek David Moyes hian vawi thum a lo dawng tawh a. David Moyes dawn zat hi Guardiola hian a rawn tluk ve ta chiah. Guardiola hian he chawimawina hi kum 2017/18 leh 2020/21 kha a lo dawng tawh a. 2022/23-ah a vawi thum nan a dawng leh. He chawimawina dawng thei tur hian City hi EPL-ah a champion pui tawh a, FA Cup leh Champions League final a hruai thleng tawh bawk. LMA manager of the year chawimawina a dawn hma hian Premier League manager of the year-ah thlan a lo ni tawh bawk.
Hmeichhe lamah Chelsea manager Emma Hayes chu manager tha berah thlan a ni a. Premier League-a Burnley kaisanpuitu Vincent Kompany chu championship manager tha berah thlan a ni a. League one manager tha berah Plymouth manager Steven Schumacher thlan a ni bawk. Manager an nihpuite ngeiin an thlan a nih vangin he chawimawina hian ngaihhlut a hlawh leh zual bik.
LMA manager of the year Pep Guardiola
Get real time updates directly on you device, subscribe now.
Prev Post
Next Post