Lunglei Municipal Council inthlan tura ZPM party official candidate-te chu Ningani khan Lungleiah puan an ni a. Candidate-te hi Tawlhloh puan bahtir nghal an ni.
Candidate puangtu ZPM working president K Sapdanga chuan an candidate-te chuan an party thil tum hrang hrang an tihlawhtling ngei ang tih an ring tlat tih sawiin, chumi tur chuan an lakah Lunglei mipuiin beiseina sang tak an nei tih a sawi.
Kan ram leh hnam min eichhetu ber chu eirukna a ni a, a té ber atanga a lian ber thlengin eirukna hi kan do tlat tur a ni, tiin, “Mi tha tak tak nia kan ngaih, kan ram rorelna inpuia thu tura kan thlantlinte pawh eirukna leh hlemhletna avangin mi chhe berah an chhuak mek zel hi a pawi em em a. LMC candidate atana kan puante hi chu eirukna leh hlemhletna laka fihlim turin kan beisei che u a ni,” a ti.
ZPM tum ber chu moral reform a ni tih K Sapdanga hian a sawi a. “Kan ram leh hnam min eichhe em emtu pakhat chu a thlawna sum dawn ‘sem policy’ hi a ni. Vote zawnna’n a ni emaw ni lo emaw a thlawna sum dawn hrim hrim hian kan mimal nun piahlamah kan khawtlang nun thlengin a eichhe hneh hle a. Vote zawnna’na sum sem phei hi chu rilru tihchhiatna zawnga pawi ber a ni a, ZPM chu hetiang kawngah hian kan fihlim tur a ni,” a ti.
LMC-a ZPM candidate-te Tawlhloh puan bahtir nghal
Get real time updates directly on you device, subscribe now.