LMC-ah executive councillor
pahnih an awm dawn – Dy CM
Lunglei Municipal Council-ah chairman leh vice chairman bakah executive councillor pahnih an awm dawn tih UD&PA changtu deputy chief minister Tawnluia chuan a sawi.
Ningani khan MNF office-ah LMC inthlana MNF candidate-te pualin hun hman a ni a. MNF senior vice president ni bawk Tawnluia chuan mipui hnena thuneihna tam zawk pek chu kum 2018 MLA inthlan dawna MNF auhla a ni tih sawiin, Lunglei Municipal Council din chu MNF manifesto tihhlawhtlinna a ni tih a sawi.
“Khawpuiah Municipal Council pek a ni ang, tiin kan tiam a. Lunglei, Champhai leh Kolasib in municipality an dil a. MNF sawrkar hnu ah cabinet meeting-in a pawm a, Lunglei Municipal din a ni. Inthlan buatsaih a nih zawh hnuah LMC ruangam a rawn ding fel chho ta a, LMC-ah hian chairman, vice chairman leh executive councillor pahnih an awm dawn,” a ti.
Deputy chief minister hian LMC-a thlantlinte chu thawhpuiah a sawm a. Danin a phal chinah chuan chak takin theihtawp a chhuahpui dawn tih sawiin, “Chumi tur chuan councillor thlantharte pawh lo inkau deuh se ka duh a ni,” a ti. Lunglei khawpui enkawlna kawnga tih tur a awm chuan sawrkar angin an tlanchhe dawn lo tih a sawi.
LMC inthlanah an party ‘nil’ mah se, chuti em ema indem leh chauhna tur a ni lo tih Tawnluia hian sawiin, “Politics-ah chuan san chang leh hniam chang a awm. Chunglamin kan harhna tur, kan hriat tur min hrilh tawh. Kan thawk zel anga, MLA inthlanah chakna kan chang leh ang,” a ti.
LMC-ah executive councillor pahnih an awm dawn – Dy CM
Get real time updates directly on you device, subscribe now.
Prev Post
Next Post