ZPM-in dikna duh punkhawm huaihawt
Mizoram sawrkar hnuaiah firm vulh bik awm nia an ngaih avang leh chu firm neitu chu minister/ MLA ni lai Robert Romawia Royte nia a lan avangin, a chungah dan anga hma lak a nih theihna’n leh firm vulh bikna hi thiah phutin ZPM party chuan Ningani khan Aizawlah ‘Dikna duh Punkhawm’ a huaihawt.
ZPM Action Committee chairman W Chhuanawma chuan dikna tungding tur leh chumi atana danin a tih tur a kalkawng kawhhmuh turin an kalkhawm tih sawiin, “Chu kawngah chuan mimal hming a lo lang a nih pawhin, a mimal takin kan haw ngawt lo. Chu kawng atang chuan namsawn kan tum mai zawk a ni,” a ti.
Politics-ah an tan loh zawng an nih avang ngawtin dawt leh thudik chawhpawlh emaw dawt ngialngan taka inchirhtheh leh inbeihna chu ZPM chuan tha an ti lo tih a sawi a. Thil dik lo leh corruption-a inhnamhnawih te chungah erawh zahngaihna an lantir dawn lo, tiin, an sawrkar a nih pawhin an hna hmasa ber tur chu corruption do a ni tih a sawi.
Punkhawmnaah hian, a hmaa an lo tarlan tawh thin, Article 192(1) of the Constitution of India tlawhchhanin Pu Robert Romawia Royte chu Section 9A of the Representation of People’s Act 1951 a bawhchhia nia sawiin, Mizoram sawrkarin a hnuaia a hman mek North East Consultancy Services (NECS) neitu nia document-a a inziah thu an sawi a, hei hi ‘office of profit’ a nih avangin MLA atanga ban tura tihna ngenna lehkha larsap hnena an thehluh dan leh a bawhzuina te sawifiah a ni.
NECS leh Mizoram sawrkar District Council & Minority Affairs department- PMJVK schemes nodal / implementing agency berin ‘single source selection’ a deed of agreement an lo ziak tih ZPM Action Committee hian sawiin, he inremna ang hi chuan Ministry of Minority Affairs atanga PMJVK scheme ho reng reng Mizoram sawrkara implementing department hian NECS lo chu emaw NECS rawn hmasa lo chuan firm/ consultant /contractor tu mah an lo pe thiang lo. Hetianga a bika mipui emaw midang inrawlh ve theih loha inlakbingna hi ‘The Mizoram Transparency in Public Procurement Rules 2020’ kalh a ni tih an sawi.
-- Advertisement --
ZPM kungkhawmte resolution pass –
# NECS leh Mizoram sawrkar DC&MA department-in single source selection hmanga deed of agreement an ziah hi a bik taka mipui emaw midang tute emaw inrawlh ve theih loh tura inlakbingna hian The Mizoram Transparency-in Public Procurement Rules 2020 a kalh a. Hetiang taka Section 9A of the Representation of People’s Act, 1951 bawhchhiatna awm hi ZPM chuan kan palzam thei lo.
# Minister Pu Robert Romawia hian November 2018-a election affidavit a thehluhah ziah lan loh (not declared) engemawzat a neih avangin false affidavit case, Section 125 of the RP Act 1951 (false affidavit) a awrh ngei turah kan ngai.
# Dan anga larsap-in a ban theihna’n ECI-in dan a bawhchhiatna a chhanna an rawn thawn thuai kan beisei.