Khawkheng leh ruahtui khawl

Mithiam ten sik leh sa inthlâk danglamna (El Nino effect) thleng turah kumin hian ruah tui tlâk dân nasa takin a tlahniam thei tih sawiin, hei vang hian khua a lum zualin khua a kheng zual ang a, chu chuan agriculture lama thar chhuah a titlem dawn a; thil man thlengin a nghawng chho dawn niin an sawi a.
Mizoram sik leh sa lo danglam chakzia hi a takin kan hmu chho mek a, tuihna a kang chat mek a, kan tui tlan lai Lui liante an kam chho mek a. Kan tuilakna Lui lian ber Tlawng pawh nikum tun ang huna tui tam dan nen khaikhinin a let deuhthawin tunah hian a tlahniam tawh a. Chutih laiin mithiamten khawkheng kan hmachhawn thei nia an sawi mek bawk avang hian, kan hmabak hi a ko hle niin a lang.
Eng vangin nge kan lui tuite a lo kang tial tial tak kan tih chuan, Tuihna siamtu ber ramngaw kan tihchereu nasat vang tih a chiang a. Mihring nunna hnar Tuihna siamtu tichereuin, hmasawnna eng eng emaw infrastructure kan din thliah thluah a. Heng hmasawnnate hi mihring kan dam chhunga thil pawimawh tak ni mah se, a aia pawimawh Tuihna insiamna kan tihchhiat phah zel a nih chuan chu hmasawnna chuan awmzia a nei ngai dawn lo a ni.
Tunah hian hei hi kan dinhmun mek a ni a. Tlawng lui hnar lamah hmasawnna ruhrel eng eng emaw din tuma hmalakna lian tak a awm a, chu chuan ramngaw zau tak a tihchhiat dawn avangin tuihna a tlem phah dawn tih a hriat reng mai a. Thing phun kan insawihmuh a, hei hi a tha, mahse, kan thingphun let sang tam tak kan kihthluk reng chuan awmzia a nei dawn lo a ni.
Kum tin ramngaw thiata eizawnna shifting cultivation hi kan kalpui reng si chuan, kan ram hi a kawlh telh telh dawn a, chu chuan ruahtui leh tuihna a titlem dawn a. Tun atang hian ruahtui lo khawlkhawm dan hi kan ngaihtuah loh phei chuan, leilung tha tak nei si hian thlai chawmna tui nei lo hian a awm theih a, chumi nghawng tur chu a langtlang vek mai.
Tuihna tikang bawk, ruahtui khawlkhawm nachang hre lo bawk kan nih chuan, kan ro vawng vawng dawn tihna a ni.