LMC roreltu ZPM

Lunglei Municipal Council inthlan hmasa ber result chu hriat a ni ta a, ZPM-in seat awm zawng zawng 11 an la fai vek a; ZPM thlipui a tleh a ni ber e.
LMC inthlan campaign lai vela party hrang hrang tan tinatu pakhat nia lang chu, he inthlan hian kumin kum tawp lama MLA inthlanpui neih turah ‘awmzia thui tak a hril thei dawn’ tih kha a ni.
Lunglei khawpui hi MLA constituency pali (North, South, East, West) awmna niin, MLA inthlanpui hnuhnung ber 2018-ah khan voter 59,998 awmin inthlana vote tla zat kha 87.96% a ni a, MNF-in bial an la fai vek a, chawhrualin bial 4-ah hian 36.41 % hmu ang an ni. Tun tum LMC inthlanah hian voter 40,548 awmin vote tla zat chu 75% thuak a ni a, ZPM-in Ward an la fai vek thung a; chawhrualin Ward tinah hian 45.45% vote hmu ang an ni.
MLA inthlanah khan Lunglei North leh Lunglei South-ah ZPM kha pahnihna ve ve niin MNF an hlat vak lo. Lunglei East-ah phei chuan MNF-in 32.91% a hmuh laiin ZPM-in 32.32% a hmu a. Tun tuma LMC election-ah hian ZPM chu chawhruala vote tla zawng zawng atanga 45.45% hmu ang an ni a, vote zawng zawng zatve thuak an hmu tihna a ni.
He chhiarkawp atanga han thlir thuak hi chuan, MLA election-ah pawh ZPM dinhmun chu a tha dawn hle niin a ngaih theih awm e.
Hetih lai hian, Lunglei MLA constituency pali voter (2018) leh LMC voter (2023) inthlauhna hi 19,450 a ni a, khawpui sawrkar inthlannaa vote nei phak lo, Lunglei MLA constituency huam chhunga voter engemawzat la awm site hian hian, MLA election-ah dinhmun a la rawn nghawng danglam pha tura ngaih theih a ni awm e.
Hetih lai hian, khawpui sawrkar tur a nih avangin LMC election-ah hi chuan a party feeling ang em ema kal lem lovin, a veng feeling leh a candidate azirin vote hi a kal kual deuh thei a, MLA inthlanpui boruak nen chuan a inang thei lovang, tih ngaihdan a lo piang zui ve bawk a.
MLA inthlanpui hi kan hma lawkah a awm tawh a, thla riat emaw vel chauh a ni tawh kan tih laiin, he thla riat chhung hian thil tam tak erawh a la inlumlet thei dawn tih a hriat a. Lunglei khawpui sawrkar inthlan boruak hian ram pum huap inthlanah eng tiangin nge nghawng a neih phak dawn tih chu mipuiin kan ngaichang leh dawn ta a ni ber e.