Lo neitute leh Congress-in India-US inremna siam tum duh lo

Lo neitute leh Congress-in India-US inremna siam tum duh lo
Indian lo neitu pawl leh eptu party-te chuan ram pum huapin India-US insumdawn tawnna tur kalpui tur duan thar chu duh lohna lantir an tum a, sorkarin an dinhmun hum tur ti mah se US atanga thil tam zawk lak luh chuan lo neihna a nghawng dawn niin an ngai.
Ram pahnihten inremna siam tura an pawm tawh hi politic-a inbeihna lian tak a chang mek bawk a, 2020–21 chhova lo neihna kaihhnawih dan thar pathum duh lohna, a tawpa sorkarin a hnuh kir tak nen pawh khaikhin mek a ni.
Sorkar chuan inremna hi a tha tih a sawi a, lo neitute duh ang chu vawn tlat a nih thu leh an tlai chin zinga tam tak – buh, wheat, vaimin leh ni tin mamawh ang chi chu lak luh a ni ve dawn lo va; basmati rice, thei, spices, coffee leh thingpuite chu chhiah chawi lovin US-ah an thawn thei dawn bawk niin an sawi.
Lo neitu pawlte erawh chuan inremna hi Indian lo neitute tana chhiatna tur niin an ngai ve thung tho.
“India-US inremna siam hi kan hlauthawm ang a, Indian lo neitute hian kan tuar thei dawn a, America-a lo neitute aia dinhmun hniam daih zawk sa Indian lo neituten kan tuar thei dawn a ni,” tiin an hruaitu, Rakesh Tikait-a chuan a sawi.
US lo neitute chuan lo zau tak an nei a, subsidy tam tak an dawng bawk a, Indian lo neitute erawh chuan a sawngbawlna tha lo avangin thil tam tak an hloh thei a, lo neihna tura mamawh man a sang zel bawk niin a sawi.
Lo neitu pawl hrang hrang 100 chuang telna, Samyukt Kisan Morcha (SKM) chuan Ningani hian ram pumah inremna duh lohna an lantir dawn a, inremna hmanga a man tlawma US lo neitute thar chhuah lak luh chuan ram chhunga tharte man a tihniam dawn a, thingtlang mite sum lak luh nasa takin a titlem dawn niin an sawi.
India-US sumdawnna tur inremna hi US lo neih kalhmanga ram dangte hmin zel a tumnaa tluk luhna niin SKM chuan an sawi a, sorkar chu inremna ziah tak tak hmaa inhnuk kir leh turin an phut.
“Sorkar hi American company-te tana hawng Indian lo neihna kawnga hmalakna hi hawng lo turin kan duh,” tiin SKM national secretary Purushottam Sharma-a chuan a sawi a, bekang tel lak luhnaa chhiah lak mek 16.5% chuan tihhniam tur chuan ram chhunga thlai atanga tel siam man a tihniam nasa dawn niin a sawi bawk.
Prime Minister Narendra Modi-a hnenah Kashmir Valley Fruit Growers-cum-Dealers Union pawhin thu thlenin apple ching hian chhungkaw 700,000 an innghat a, US atanga lak luha chhiah 100% aia sang lak luh an phut.
Eptu party lian, Congress party chuan inremna siam tum chu ram leh lo neihna thila ‘inpekna pumhlum’ tia sawiin thawn chhuah tura chhiah lak tur kimchang engmah siam a ni lo chu an duh lo va, sorkar chu thup tlatah an puh.
Lo neitu hruaitute pawhin inremnaa thil inziak kimchang chu pho chhuak turin sorkar an ngen bawk.
US Agriculture Secretary Brooke Rollins-i’n India-a US thlai thar thawn chhuah tam zawk a nih tur thu leh a man tisangin American thingtlang mite chawikan a ni dawn tia a sawi chu sawi chhuakin, “He inremna ang hi chuan India hi bawlhhlawh chhe paihna hmunah a chantir a ni dawn,” tiin Congress hruaitu, Pawan Khera chuan a sawi.