Loan-a chhuak lo tur Messi

Loan-a chhuak lo tur Messi
Major League Soccer season hi Europe leh ram dang league thenkhat season nen a inrual lo a, chuvangin MLS an chawlh lai hian an player-te tan ram dangah loan-a kalna hun thawl a awm hlek a, Inter Miami star ni ta Lionel Messi pawh America lama awllen lai hian a club hlui Barcelona pui lawk turin Spain-ah loan-in a kirleh mai ang em tih zawhna a piang mek a, chu boruakah chuan Spanish football expert Guillem Balague a tawngchhuak a, loan-a Argentine chhuah loh tur thu a sawichiang.
Inter Miami hian Messi an lalut hi an han chhawr mai mai khawp a, an captain telin vawiriat an chak a, a tel lohin vawikhat chiah an la chak!
Chutiang khawpa Miami club tana thawhhlawk kum 36 mi chu Catalan lama kir tur angin thu a thang a, report dangah chuan Saudi Pro League nena sawizawm a ni bawk.
Karliamta Inrinnia sikhat faia FC Cincinnati an hneh loh avang khan Inter Miami hi play-off khel turin an tling zo lo a, October ni 21 khian an season a zo fel ang a; MLS regular season a tawp hnuah an captain hian Argentina tan World Cup qualifiers khelin, November ni 17-ah Uruguay leh ni 22-ah Brazil a hmachhawn ang a, chumi hnu chuan thla khat chawlh a nei dawn niin a lang.
Argentine World Cup winner Messi hi thla hmasa September thlatir lam khan a inhliam ta tlat a, kha mi hnu khan MLS lamah minute 72 chauh khelmualah hun a hmang a, a team vawn laiin play-off an khelh phak loh chhan pakhatah pawh a kawh theih hial mai thei!
Nakkum February thla daih hi MLS season thar tan hun a ni a, a hliamte pawh a ziaawm chhoh chuan he hun awlah hian sum tam mangkheng hlawh turin Arab lamte hian loan-in an sawmchhuak thei mai ang em tih zawhna a lian chho mek a, tah tak chuan Balague a lo inrawlh vat a, “Messi hian footballer dangte ang bawkin thla khat vel chawlh a nei thei dawn a, Saudi emaw league dang emaw pan tur anga ngaihna chu theihnghilh nghal rawh u,” a ti!
Ballon d’Or vawisarih dawng tawh hian kumin July thla khan Paris St-Germain chhuahsanin Inter Miami a zawm a, a club thar chu August thla khan a vawikhatna atan Leagues Cup trophy a lakpui a, US Open Cup lamah erawh a hlawhtlinpui zo ta lo.
Inter Miami tana game 13 a khelh tawh atangin goal 11 tehreng a tilut tling tawh a, chu’ng zinga goal kgat chiah chu MLS game nga atanga a thun a ni thung.
Tarlan tawh angin, kum 21 a khawsakna chhuahsana kum 2021-a PSG a zawm hnu khan Barcelona lama kirleh tura sawi a ni chho reng a, America thleng thleng a thlen hnu tunhnai thlengin sawi a la bang thei lo.
Inter Miami manager Tata Martino pawh chumi chungchangah chuan a ngawi thei ta bik lo a, FC Cincinnati laka an tlawm tuma media a hma-chhawn tumin, “A mak zozai mang e. Chumi chungchang chu engmah ka hre ve lo. A chawlh hman laiin Barcelona tlawh a tum tih min hrilh dawn chuan, aw, ni e, tlawhte pawh a lo va tlawh mahna, mahse, chumi chungchangah chuan engmah hriattir ka ni ve lo,” a ti bul hmuk!