India ram hmundangte rualin Inrinni khan Mizoramah National Lok-Adalat neih a ni a, thubuai 317 an chingfel hman.
-- Advertisement --
State Legal Services Authority kaihhruaiin Mizorama district 8-a Legal Services Authority (DSLA) bakah Gauhati High Court Aizawl Bench-ah Lok Adalat hi huaihawt a ni a. Tun tuma thubuai ngaihtuah tur district hrang hranga lutkhawm hi thubuai 695 a ni a; thubuai chinfel hman hi 317 a ni.
Lunglei bikah chuan thubuai 30 chuang ngaihtuah hmanah 15 remfel a ni a, cheng nuai 4.5 chuang thin chhuah a ni. Kolasib-ah chuan bank loan rul tha theilo thubuai 84 ngaihtuah hman a ni a, Rs. 50,33,096 hmuhlet a ni. Thubuai dang 38 ngaihtuah zingah 5 chinfel niin, civil case atang hian Rs.8,47,000 hmuhlet a ni bawk.
Lok Adalat hi court pangngaia kal loa samkhai zawk leh sum sen ngai loa thubuai chinfel tuma mipui tana ruahman a ni a. Mimal inkara sum inpuktir rul tha thei lo, bank loan rul tha lo, ro inchuhna, ram inchuh leh civil thubuai dang hrang hrang a lut thin a, inkhinna hmun niloin inremna/ inremsiamna zawnna hmun a ni a, sum chawi ngai loin thubuai hi remsak thin a ni. Thubuai rem tur hian judicial officer, ukil leh social worker te an thu thin a ni.