Lok Sabha 2024 a danglamna siamtu pawimawhte

Exit Poll a chak turu taka chhuah an nih hnu lawkah Narednra Modi kaihhruai Bharatiya Janata Party (BJP) chuan inthlan result puanah an beisei an pha lo hle thung a, majority pawh an hlat hle a ni.
BJP te chuan inthlan hmain anmahni ringawtin seat 370 an lak phak tur thu sawiin National Demoacratic Alliance (NDA) chuan seat 400 an lak phak tur thu an tlangaupui a. Exit poll lakah pawh NDA te narrative chu a dik dawn tiin chak hle tura dah an ni.
Nikum December thla khan BJP te chuan Madhya Pradesh, Chhattisgarh leh Rajasthan State Assembly inthlanah chakna an chang bawk a, kha vang khan Lok Sabha-ah chuan awlsam zawkin chakna an chanphah turah an ngai bawk. An confidence chu Ram Mandir hawnin a tizual a, chumai bakah Bihar Chief Minister Nitish Kumar chuan INDIA bloc chhuahsanin NDA a zawm zui bawk.
Mahse, inthlan thawhkhatnaa vote tla chhe lutuk chuan BJP ten an beisei angin thil a kal dawn lo tawp mai tih an hrefiah nghal a, an campaign dan pawh thlakin Muslim huatna lam te namen lovin an kalpui zui a, Hindu vote hui pup chu an tum ber a ni. Mahse, inthlan thawh dangah pawh vote a tla tha tak tak thei ta chuang lo a ni. BJP ten an beisei anga thil a awm lohna chhan ni theia ngaih te…

-- Advertisement --

1. Anti-Incumbency kum 10
Kum sawm chhung rorelna kalpui tawh an ni a, sorkar ngai ninna nasa tak a awm ve tho va, chu chu tun inthlana BJP te tichhetu pakhata ngaih a ni. Chumai bakah Modi sorkar chuan India mipui nawlpui te nitin nunphung tibuai thil pathum: thil man sang, unemployment leh corruption chu a hai der tlat bawk a. Thil man sang leh hna vang ngat phei hi chu kumin inthlana issue chungnung bera ngaih a ni a, BJP sorkar chuan chhanna mumal a nei lo.

2. Chung tlakna
BJP te hian state pawimawh ber berah chunglam atanga chungtlaka rorelna a kalpui nasa tia sawi a ni bawk a, chu chu an beisei an phaklohna pakhata ngaih a ni. Indian civilisation hian inngaihtlawmna te, midang hriatthiamna te mai bakah hmelmate pawh zah a dah chungnung tlat a, chu chu mipui nawlpui ziarangah thuktakin a inphum tlat bawk.

3. Chak tur chiangsaa inngaihna
Ram Mandir hawn a nih hnuah BJP te chuan Hindu vote hui puk turah inngaiin chak tur chiangsaah an inngai bawk a. Ram Temple hawn a nih hnuah opposition tam tak te chu an hnual hle tak bawk a, tun inthlan chu thil pangngai a ni mai dawn tia ngaite pawh an awm. Ram Temple hawn boruak chu a turu tak zet a, mahse, mak tak maiin BJP te chuan hlawkpui nan an hmang hauh lo. Ram Temple awmna Ayodhya ngei Faizabad constituency-ah pawh an chak chuang lo.

4. Congress Manifesto thlurbing lutuk
BJP tena an tihsual lian ber pakhata sawi bawk chu Congress manifesto a na thei ang bera beia kum 1935 a Muhammad Ali Jinnah kaihhruaia siam Muslim League manifesto nena an khaikhin vel chu a ni. Congress manifesto an beihna lamah Congress document chu a lailum an luahtir zawk a, sawi berah mipui nawlpuiin an neih phah ta daih a. Congress ten agenda siamin BJP te chuan an bei zawk ta tlat a ni.

5. Constitution chung chang
BJP ten ‘400 paar’ tia slogan an aupui chuan hlet a chhuah bawk. BJP leader Anant Hegde chuan constitution thlak danglam turin BJP ten seat 400 kan mamawh tia a sawi te chuan Dalits leh backward classes ah hlauhna a thlen a, BJP te chuan an constitutional rights leh privileges te chu laksak tumah an ngai a ni. Chutih laiin Rahul Gandhi leh INDIA leader te chuan Constitution bu chu rally an neihnaah te kengin chumi hmang chuan vote an dil thung a. Dalits te chuan Constitution duangtu ber Babasaheb Ambedkar kaihhnawiha inhnialna awm thin chu Ambedkar legacy beihnaah ngaiin an tei thei lo.

6. Reservation-ah hlauhna
Opposition te chuan Constitution debate chu reservation lamah an kailut a, BJP te chuan thuneihna an chang leh a nih chuan SC, ST leh OBC te hnena laksak an tum tia sawiin chu chuan heng group te-ah hian hlauhna a tuh bawk.

7. Hindu-Muslim rhetoric
Prime Minister chuan communal line hmanga vote thendarh a aupui bur bawk a, Muslim ngaihtheihlohna lam hawia thusawi a neih fo chuan voters te a hip hauh lo. Campaign laia CSDS survey neihah pawh voters te chuan Hindu-Muslim inbeihna lam hawia thil sawi chu an duh lo tih sawi a ni a. Survey neihah chuan 2% te chauhin Hindutva chu election issue-ah an ngai a, 50% chuangte chu India chu plural society a nia chutiang chu a ni reng tur a ni an ti thung. He inthlan hian Hindutva limit zia pholangin communal polarisation chu economic delivery a chhiat bawk si chuan a kalpui tak tak theih loh bawk. Muslim te beihnat an nih poh leh BJP te duhlohnaah a tilungrual ting mai bawk.

8. Opposition tumruh
INDIA bloc te tumruhna chu factor pawimawh tak a ni bawk. Opposition leader te chuan BJP te chu bei char charin an narrative dinchantir turin hmun awl an pe duh miah lo bawk a. Hei tak hi ruling party tihlawhchhamtu lian ber pakhata ngaih a ni.

9. Rahul Gandhi
Kumin inthlanah hian Rahul Gandhi chu hruaitu tlak tak tak niin a hlangkai a ni. A bharat Jodo Yatras pahnih te chuan Congress leh Rahul Gandhi a tichak hle.
Eng vangin nge BJP tena mipui 80 crore te tana free ration an tiam chung pawha seat 272 an lak theih loh?
Inthlan tin hi a danglam vek a, tunah pawh BJP kaihhruai sorkar chu a piang leh tho mai theia chuti chung chuan BJP vung tak kha a awm thei tawh lo hrim hrim. Chuvangin hun lo la kal turah politics danglam tak India in a tawng chho turah pawh a ngaihtheih.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More