Lok Sabha-ah Bill pass lohna turin tawngtairual turin kohhran inhrilh

Kristian-te tana kawng hrang hranga that lohna tur nei bill, Lok Sabha-a putluh tur chu pass a nih lohna turin hemi puala tawngtai rual turin kohhran an inngen.
National Council of Churches in India general secretary Rev Dr Asir Ebenezer chuan an hnuaia kohhran hrang hrang hnenah ngenna tichhuakin, Foreign Contribution Regulation Act (FCRA) Amendment Bill 2026 chu Lok Sabha Session July 21 atanga August 21 ah hian ngaihtuah a ni dawn a, he Bill hi pass a nih lohna atan tawngtai rual turin a ngen. He Bill hi pawm a nih chuan kohhran leh para-church nasa takin a nghawng thei dawn tih a sawi a ni.
He dan hi hman a niha a nghawng tur langsar zual sawiin, ‘Kohhran thil neih (ram leh in) sawrkarin a chhuhsak thei a; retheite tana rawngbawlna leh vantlang tana rawngbawlna kalpui mek tihtawp theih a ni. Zirna leh tihdam rawngbawlna – kohhran leh mission rawngbawlnain kalpui a tibahlah thei a; Dalit leh tribal chunga hleilenna nasa zawk thlen tir leh hemi kawnga kohhranin hma a lo lakna kawngah harsatna a siam thei. Hnam tlem zawk (minority) te dikna chanvo (constitutional rights) rahbeh sak leh an tana rorelna dik awm thei turte tihbo sak theih a ni,” a ti.
Heng thil hi FCRA Amendment Bill-in a ken tel tur a nih avangin, he Bill hi pass a nih lohna turin NCCI chuan June 28 (Pathianni) hi National Day of Prayer-ah a puang tih a sawi a. Mizoram-ah pawh NCCI zawmtute chuan hei hi zawm turin an inngen.
NCCI zawmtu Mizoram Presbyterian Kohhran chuan June 28 (Pathianni) zan inkhawmah tualchhung kohhran tin chu he Bill pass a nih lohna tura tawngtai rual hi hmang turin an inngen tih a sawi a ni.