Lok Sabha inthlan thawh rukna chu vawiin hian neih a ni dawn a. Ningani khan campaign tawp tawhin BJP leh INDIA bloc te inbeihna a nasa hle.
Haryana-a Mahendragarh a rally neihnaah Prime Minister Narendra Modi chuan INDIA bloc te chuan kum nga chhungin prime minister panga neih hman an tum a, bawngin hnute a pek chhuah hma hauhin ‘ghee’ an inchuh nghal der tawh tiin a sawi.
Congress president Mallikarjun Kharge chuan INDIA blic chuan BJP te nem thlain sorkar siam turin MP an ngah tawk dawn tiin a sawi thung a.
Inthlan thawh ruknaah hian seat 58-ah inthlanna neih tur niin candidate 889 an awm a ni. Tun inthlanah hian State 28 leh union territory-ah te chuan inthlan zawhfel a ni dawn chiah bawk.
Party tin Star campaigners te pawhin national capital an lut tawh hlawm a, May 25 hian Delhi-a Lok Sabha seat pasarihah inthlanna neih a ni ang a. Kum 2019 khan BJP ten seat an lak vekna a ni bawk.
Delhi Chief Minister Arvind Kejriwal chuan may 21 daih tawh khan BJP te chuan June 4 a inthlan result puan a nih hnuah Lok Sabha seat an hloh vek tih an hria ang tiin a sawi a. Modi “Achhe din aane wale hain” pitch chu her danglam sakin “Modiji jaane wale hain” a tihsak a ni.
National capital a campaign a neihnaah Kejriwal chuan INDIA blic sorkar Centre ah a piang ang a, Delhi chuan statehood a nei bawk ang tiin a sawi a.
-- Advertisement --
Sonia Gandhi ngenna
Congress president hlui Sonia Gandhi chuan video message tichhuakin Delhi mipui te chu INDIA bloc vote turin a ngen a.
Congress leader Rahul Gandhi pawhin Delhi-a an thawhpui AAP party te candidate tan a campaign bawk a. Ningani khan Metro-ah chuangin northeast Delhi a Congress candidate Kanhaiya Kumar a campaign pui bawk.
May 21 khan Chandigarh a rally a neihnaah Rahul Gandhi chuan system chu lower caste te tan a Tha lo takzet tiin a sawi a. India mipui 90% te Dalits, OBCs, Tribal leh Minority te pawh telin power structure-ah aiawh an nei lo a ti.
West Bengal-ah chuan Chief Minister Mamata Banerjee chuan Khardah a rally a neihnaah Calcutta High Court-in State-a classes hrang hrangte OBC status a nuaibo chu a pawm dawn lo a ti bawk a. A sorkar chuan Supreme Court ah an khin tur thu a sawi.
West Bengal-ah hian seat riat-ah inthlanna neih a ni ang a, vote nei 1.45 crore vel an awm a ni.
Delhi-ah inbeihna nasa
Delhi seat inchuhna a nasa hle a. Kar kalta khan Modi chuan North East Delhi leh West Delhi ah rally a nei a. Union Home Minister Amit Shah pawhin a nei bawk a, anni bakah Union Ministers Rajnath Singh, Nitin Gadkari, Smriti Irani, leh Piyush Goyal te pawhin an nei bawk.
BJP rorelna state Chief Minister Yogi Adityanath (Uttar Pradesh), Pushkar Singh Dhami (Uttarakhand), leh Pramod Sawant (Goa) te pawhin Delhi ah campaign an nei bawk.
Kumin inthlanah hian Delhi bikah BJP leh INDIA Alliance te chu inbei tur niin inthlan hnuhnung berah khan BJP te chuan seat awm zawng zawng pasarih an hui vek a ni. Kuminah erawh AAP ten seat 4 chuhiin Congress ten seat thum an chuh thung.