Mizoram Lokayukta hnuaia case 47 ziahluh tawhah case 16 chinfel a ni tawh.
-- Advertisement --
Mizoram Lokayukta Act 2014 chhunga section 47-in a phut angin Thawhlehni khan Mizoram Lokayukta chairperson C Lalsawta chuan larsap Hari Babu Kambhampati hnenah Third Annual Report of the Mizoram Lokayukta (2021-2022) a hlan. 2023 January 31 thleng khan Lokayukta hnuaiah case 47 ziahluh a ni tawh a, heng zinga case 16 chu chinfel a ni tawh. Case kal lai 31 a awm a, heng zinga case 11 chu preliminary enquiry nei turin a inchiah mek. Case 16 chu chhuizui turin Anti Corruption Bureau kutah a awm.
Third Annual Report of the Mizoram Lokayukta hi Mizoram Legislative Assembly-ah pharh a ni dawn a. 2021 April 1 leh 2022 March 31 inkar a huam a ni.
Mizoram Lokayukta chairperson hian larsap hnenah Mizoram Lokayukta dinhmun leh hmalakna tlangpui a hrilh a. Tun dinhmunah infrastructure tha tawk an la nei loa, thawktu mamawh zat pawh la nei thei rih lo mah se, hna erawh tha tak leh tluang takin hna an thawk zel tih a sawi. Larsap zawhna chhangin C Lalsawta chuan, case kal mek thenkhat a sawifiah a, ACB chhui lai mek leh chinfel tawhte, an dinhmun leh thlen chinte a hriattir a ni.