Sailam rama Lau Lui Minor Irrigation Project siam thar chu Inrinni khan Irrigation & Water Resources minister C Lalrinsanga’n loneitute kutah a hlan.
-- Advertisement --
I&WR department hian JICA project, Technical Cooperation Project (TCP, JICA) hnuaiah department dang pathum – Agriculture, Land Resources Soil & Water Conservation leh Horticulture te nen tangrualin Sailam khuaa Lau Lui MI Project hi an kalpui a. He project hnuaiah hian Aibawk RD Block chhunga Sailam khuaa loneitute tan leilet chawmna tui kawng tha zawk leh a panna kawng thawmthat hna thawh a ni. Project zawh hnu ah helai hmuna leilet neitu – Charpui Water User Association hnenah hlan a ni.
Lau lui MI Project hi JICA TCP hnuaia siam niin, contract works leh community works-a then a ni a. Contract works hi cheng nuai 58.90 hu a ni a, M/s Excel Consultancy Services-in a thawk. 2019 February 26-ah hna hi tanin 2020 May 14 khan an zo. Community works hi Water User Association-in thawkin 2019 March 5-ah an tan a, 2020 January 30-a zawh a ni.
Lau lui MI project-ah hian tui lakluhna, tui kawng leh lak penna, a dahkhawlna, a panna kawng siamthat leh thildangte a tel a. Project pumpui zawh nan hian nuai 67.275 hman niin, sum senso zawng zawng hi Japan International Cooperation Agency (JICA) atanga hmuh a ni.
JICA India hian ei leh bara Mizoram intodelhna’n agriculture lamah kum 20 chhung atan master plan a duang a. Lau Lui MI Project pawh hi master plan atanga siam niin, farming system thara luhpui tura duan a ni.
Lau Lui MI Project hringtu JICA hnuaia Technical Cooperation Project chu hun engemawchen kalpui a nih hnu ah a tawp hnai a. He project atanga chhunzawm tur lo neih dan kalhmang thar – JICA Farming System (JIFAS) kalpui turin JICA leh Mizoram sawrkar an inruahman mek. JIFAS hnuaiah hian line department ten CSS an hmuh angte hmang tangkaia chhunfinna siamin JICA TCP hnuaia hmalakna angin farming system tha zawk leh changtlung zawk, intodelhna kawng zawh tura hma lak a ni dawn a ni.
JICA India chief representative Saito Mitsunori chuan India ramah loneitu tluklehdingawn khat dawn an awm a, an ni ngaihtuah hi tih makmawh a ni, tiin, Mizoramah pawh loneitute dinhmun chawikan chu kan damna tur a ni tih hria in JICA chuan kawng hrang hrangin state sawrkar nen hma a la tih a sawi a ni