LPS Cup Round of 16: Armed Veng leh Vaivakawn tlang ve leh
LPS Cup Round of 16:
Armed Veng leh Vaivakawn tlang ve leh
Ningani zanah Mahindra XUV3OO LPS Cup last 16 inkhel vawihnih thlir tur awm lehin, penalty peta Durtlang hnehtu Armed Veng leh hun pangngaia Kulikawn tukzaltu Vaivakawnte chu a thiam zual pariat zingah an inhlangkai.
Armed Veng 0-0 (5-4 pen) Durtlang
Armed Vengin derthawng takin Mahindra XUV3OO LPS Cup quarter-final an lut a, hun pangngaiah Durtlang nen goal awm loa an inhnehtawk hnuah penalty pet hmangin an chak.
Rajiv Gandhi Stadium, Mualpuiah Armed Vengin nawr hnem zawk mah se Durtlangin khung mai theihna remchang an nei tha zawk a, goal lut loin hun pangngai an hmang zo.
Penalty pet hmanga a chak zawnnaah Durtlang tan Lalthlamuana’n goal chungah a pet chhuak a, goalkeeper Lalbiaknunga’n Armed Veng tana pen chhuak Timothy Lalruathlua pet dansak ve lehin, panga ve vein an pet hnuah an inhnehtawk zui zel a ni.
Durtlang tan captain Joseph Lalsanglura a pen chhuak a, goal chungah pet chhuakin, R. Lalrindika’n champion lai Armed Veng chakna’n a chhuihlut ve thung a, penalty petah goal nga goal liin round of 16 an paltlang ta a ni.
Vawihnih champion tawh Armed Vengin tournament chanchina champion hnem ber Ramhlun South tluk turin trophy pakhat an la mamawh a, team hlawhtling pahnih hian quarter-final lut ve vein, Inrinni zanah final thlenga an inkhelh chhoh dan tur pawh that a ni dawn a, an insu thei dawn a ni.
Durtlang forward Lalsangzuala’n first half tawp lamah hun tha a nei a, defender VL Hmangaihsanga ball chan lai a chhuhsak hnuah a pet a, goalkeeper KC Vanlalruatdika’n Armed Veng chhanhimin a dansak.
Second half laihawlah Lalthanzama’n defender pakhat kharah khalh remin, hnai tak atangin a pet a, Durtlang tana hun tha ber bawhpelhin hnai tak atangin goal chungah a pet chhuak a ni.
A hnu lawkah Armed Vengin corner an pet atangin thun mai theihna hun tha an nei zui ve nghal a, Hmangaihsanga’n hnai tak atangin goal zawn loah a khupin a do chhuak hlauh.
He inkhelah hian Armed Veng LC player pawimawh Lalawmpuia Hnamte (J. No 7) chu Divya player of the match atan thlan a ni.
Vaivakawn 2-1 Kulikawn
Hun tawp dawnah Benjamin Lalnunpuia’n Vaivakawn tan a khung a, Ningani zan Mahindra XUV3OO LPS Cup round of 16-ah goal hnih goal khatin Kulikawn an hneh.
Rajiv Gandhi Stadium, Mualpuiah Vaivakawnin bul an tan fuh a, minute ngaah corner petin Kulikawnin an dang chhuak thei lo a, Lalruatkima Dosel chuan kawh zetin a chhuih lut.
An khung belh nghal teuh hle a, a hma lawka corner pettu Moody Lalawmpuia ball pek tha tak um falin Benjamin-a’n a pet tha tawk lo a, Kulikawn goalkeeper Vanlalaruata’n a dansak a ni.
Kulikawn forward Jonathan Lalfakawma’n an si phurh sut tumin thahrui tha tak a neih lantir mah se hmawr a bawk fuh tawk lo a, goal zawn lo chiahah a pet chhuak.
Minute 31-ah corner atangin an siphurh an sut ta tho a; penalty box pawn atangin Lalhriatpuia’n ball lo chhuak a pet a, goalkeeper Lalhruaizela dan theih lohin nalh takin a chhuih lut.
Team pahnih an inhnehtawk zui hle a, hun pangngai tawpna’n minute sarih a la awm tihin David Lalrinpuia’n tha takin ball a vawrh a, defender khum chiahin Vaivakawn forward Benjamin-an ball lam pana tlan hma keeper Vas-a tauh khumin a khung a, Divya Player of the Match lawmman a dawng.
Hun tawp lamah Kulikawnin an nawr nasa a, minute 90 hnu hun pek belh minute ruknaah Jonathana’n a sir atanga ball a thawnluh chu goal hmaa awm George Lalruatkima’n goalkeeper zawnah a tauh a, Hruaia’n mansakin hun a tawp zui nghal a ni.
Tarlan tawh thin angin, nizanah round of 16 an khel zo a, zanin hian LPS Auditorium-ah dar 8 atangin quarter-final atanga final thlenga an khelh dan tur an pawt tha leh dawn a ni.
Nimin inkhel hmasa zawk result tarlan hman lohah Republic Veng LC leh Sihphir Venghlun VC intumin, zan dar riat atanga khel tan Ramhlun North LC leh Sialhawk VC inkhel result pawh tarlan hman a ni ta lo.