LPS Pro Fight hmawr bawk a hnai zel

LPS Pro Fight hmawr bawk a hnai zel
LPS Arena, Falkland Venga Tata SK 612 LPS Pro Fight khelh mek chu a hmawr an bawk chho hnai hret hret a, Thawhlehni zan kha a zan 23-na niin, quarter-final inhnek vawi sarih a awm a, chumi lam chu kan hawi dawn a ni.
NT Lalbiakkima’n rahbi tuk sang zelin C. Lalchhanhima a hneh a, a rualin Lalrinngheta leh C. Lalhruaitluanga’n semi-final an lut ve bawk.
FLYWEIGHT
Siaha fighter Biakkima’n unanimous decision hmangin Mamit Venghlun rawlthar C. Lal-chhanhima a hneh a, Zirtawpni zan flyweight semi-final inhnek pakhatah Lalhruaitluanga (Bawng-kawn) leh Emmanuel Vanlalthlengliana (Melthum) chak zawk nen an innuai zui ang.
Kum 27 mi Biakkima tan vawiruk Pro Fight champion hmasa ber nih a tumna kawng a awlsam lo a, kum 19 mi Chhanhima’n a tir atangin ngam takin a hmachhawn a, an inhnek tawn nasa hle a ni.
Tawn hriat nei Biakkima’n tuar hnem hle chungin a hnek hneh zawk a, lehlam taksaah hnek sakin, a bekah na tak takin a vai fuh a, rang leh thui taka a vei lam a hnek chhuah thinin Chhanhima a tibuai bawk.
Hetih lai hian Mamit Venghlun rawlthar hian round hnuhnung berah fei takin a bei a, judge pakhatin round khat chaktirin 30-27, 30-27, 29-28-in Biakkima a tlang a, hnuhma tha chhunzawmin Pro Fight a khelh tawhah a bitum a la hneh fai vek a ni.
LIGHT
Tuipui tlangval Rinngheta’n split decision-in Tlungvel Venghlun fighter Lalhmingsanga a hneh a, 30-27, 28-29, 30-27-in a chak.
Kum 21 mi Rinngheta hian veikhawr Hming-sanga’n na taka a vei lama a hnek chhuah bumin fuh takin a hneh let fo a, rang leh ngil taka a hneh zawn thin hmangin hnek dik zawk a nihna a lantir bawk. Chutih rualin langsar thamin inhnek a thunun zo bik lo a, kum 26 mi Hmingsanga’n tharum a nei a, ngampa leh inringtawk takin a bei tluan a ni.
Bantam champion lai Rinngheta’n weight hrang pahniha champion tumin light-ah chona a hmachhawn mek a, Cherhlun boxer C. Lalhruaitluanga nen Zirtawpni zan semi-final-ah an intawng ang.
Kum 21 mi Hruaia’n inhnial theih takin a hmingpui Zanlawn fighter Lalhruaitluanga a hneh a, quarter-final a paltlang hram.
Ban sei zawk Cherhlun tlangvalin tawlh kual pahin a hnek a, inveng chungin a vei leh ding rang taka a chhuah zawn thin hlawhtlinpuiin inhnektawnah kut rang zawk a nihna a chhawr tel bawk.
Kum 26 mi Hruaia’n pan ve thungin, chiang taka hnek fuh a nei fo a, round hnuhnung berah a kut chhuak a langsar lehzual a, mahse, judge pahnihin 29-28 ve vein Cherhlun Hruaia an chaktir a, pakhatin 29-28 thoin Zanlawn boxer a pe hnem a, inhnehtawk takin round thum an hmang zo.
MIDDLE
Middle-ah a vawikhatna’n welterweight cham-pion lai Hruaia a inlan a, round khat hmang zo loin College Veng boxer Lalruatpuia a hneh a, Zirtawpni zan semi-final-ah Timothe Malsawmdawngliana (Sihphir Venghlun) leh Chinsuanlala (Teikhang) chak zawk a hmachhawn ang.
Kum 25 mi Hruaia’n inhnek awpbet nghalin, an kutthlak a inthlau a, vawi li chiang taka a hnek fuh hnuah a umtu zawkah a tang zui a; Ruatpuia inveng ringawtin lehlamin a hnek zawn laiin inhnek tihtawp a ni a, minute hnih leh second 31-ah technical knockout-in Chawngtlai boxer Hruaia a chak.
WELTER
Lalruatzela’n mitko ding lam kak chungin welterweight semi-final a lut a, Lalramdinmawia’n Zonunzira a knockout ve thung.
Mission Veng tlangval Ruatzela’n round hmasa berah hnek tlu mah se Saithah boxer Justine Renthlei chuan a beilet nasa a, hmuhnawm taka round thum an inbeih hnuah judge pathumin 29-27 vekin kum 22 mi Ruatzela an chaktir a ni.
Ruatzela’n a bekah chiang taka a hnek vangin Justine-a a tlu a, chhiar ngaia a hnek tluk round khatnaah 10-8-in Mission Veng tlangval a chak a, Saithah boxer tan round dang pahniha chak turin hun ]ha a tlem zui hle.
Round hnihnaah bawihsawm ngaiin Ruatzela mitko ding lam a kak a, khel zui thei mah se Justine-a’n a hnek tam hle a ni.
Round hnuhnung berah Mission Veng tlangval insiamthain hliamin a tibuai zui lo a, inveng chungin tha tak takin a hneklet a, hnehna hlu tak a chan rualin GIG Motor Fighter of the Night-a thlan a ni.
Welter quarter-final dangah Kawnmawi fighter Dinmawia’n seed zinga mi Nunzira a lehthal a, vawihnih a hnek tluk hnuah tho leh mah se round hnihna second 51-ah a knockout a, Zirtawpni zanah Ruatzela nen final luh inchuhin an inhnek zui dawn a ni.
South Lungpher tlangval Nunzira’n taksa lamah harsatna tawkin a inpeih tawk lo a, kum 17 mi Dinmawia’n round hmasa berah a vei lamin a hnek tlu a, round hnihna tirah a hman thiam a vei lamin a hnek tlu leh a, kum 24 mi Nunzira tho leh mah se a ding rei zui tawh lo.
A hmain tawnhriat nei lo Keitum boxer Lawmsangzela a hnek tlu tawh a, mahse, beiletin a knockout zui thei a, Dinmawia lakah erawh a kir leh zo tawh lo a ni.
BANTAM
Bantam quarter-final inhnek hmasa berah Pangzawl fighter Ramdinthara’n split decision-in Darlawng boxer Lalpektluanga a hneh a, Inrinni zan semi-final-ah Lalpianpuia (Khuanthing) leh Omega Lalramdina (Dinthar) chak zawk a bitum leh ang.““
Kickboxer Ramdina’n dik leh thui taka a hnek chhuah thin hmangin Pektluanga a tibuai a; inhnaichilhah a kut a rangin hnek dan chi hrang hranga hnek chhuah zawn a awlsam bawk a, inhnehtawk tluan zak chungin a dinhmun a siam thei a, 29-28, 28-29, 30-27-in a chak.
Middleweight-ah boxer 14 telin 16 an tlin loh avangin semi-final lut chinin lawmman pawisa fai an dawng dawn a; weight dang zawngah quarter-final-a tlain Rs. 5,000 zel an la a ni.
Semi-final stage atangin professional boxing glove hman a ni dawn a, round thum ni tawh loin round li an khel tawh ang.