Zofate nekchep duh lohna lantir

Zofate nekchep duh lohna lantir
MNF Thalai Hqrs bultumin Inrinni khan Aizawlah Manipur-a Zofate nekchep an nih duh loh lantirna sit-in demonstration neih a ni a. Kalkhawmte hian Manipur-ah remna leh muanna a awm theihna tur leh Zofate nekchep an nih duh lohna thuziak an keng.
MNF Thalai president L. Thangmawia chuan hun harsa tak tawkin kan unaute Manipur hmun hrang hrangah an awm a. Mizoram atanga zirlai awmte leh zin veivak tangkhang awmte pui turin chief minister thu angin Mizoram sawrkar hotuten hma an la a. Manipur-a kan unaute pui tur leh a tih theih ang ang ti turin kan kal dawn a ni, a ti.
Kalkhawmte hian resolution an pass a. Manipur-ah remna leh muanna a awm leh thuai a, mitinte thlamuang taka an awm leh thuai an duh thu leh, remna leh muanna a awm theihna’n Mizoram mipui, sawrkar, kohhran leh tlawmngai pawlte zai ngai hram hram turin an ngen thu an sawi.
Manipur tualchhung buaina chu a rang thei ang bera chinfel a nih theihna’n chak taka hma la zel turin sawrkar laipui leh Manipur sawrkar an phut tih an sawi a. Manipur-a remna leh muanna a awm theihna tur leh Mizoram mi tangkhangte tanpui tura chief minister Pu Zoramthanga hmalakna chhuanawm an tih thu te, Manipur sawrkar pawhin tangkhangte lachhuak tura Mizoram sawrkar hmalakna tikhawtlai loa, pui nghal zel tura an ngen thu te an sawi bawk.
‘Manipur-a Zo hnahthlak unaute an harsatna tawh apianga tanpui zel turin an kiangah kan ding reng dawn a, he buaina avanga kan unau sahimna zawnga Mizoram rawn pante hmangaihna nen lo kuangkuah turin Mizo mipui kan ngen a ni,’ a ti.
Myanmar, Bangladesh leh Manipur-a kan chipui leh unaute harsatna tawh chhawmdawl tura tlawmngai pawl leh kohhran, political party hrang hrang tanrualna lawmawm an tih thu an sawi a. Mizo mipui tanrualna chuan Zofate inpumkhatna tha zawk a siam an beisei tih an sawi a ni.