Lui humhalhna dan duan chhin en ho

Lui humhalhna dan duan chhin en ho
Mizorama lui hrang hrang humhalh tumna atana Committee on Draft Mizoram Protection Bill hnuaia Sub-Committee in dan a duan chhin chu Ningani khan an chairman, deputy chief minister Tawnluaia kaihhruaiin thlir ho leh sawi ho a ni a. Agriculture minister C Lalrinsanga leh LAD minister K Lalrinliana bakah chief secretary Dr Renu Sharma te pawh an tel.
Mizorama lui hrang hrang chu in tur atante, thlai chawmna atan leh thildanga kan rinpui ber an ni tih deputy chief minister hian a sawi a. “Mihring kan kan pun angin tui mamawhna a sang chho ve zel a, hetihrual hian kan tuihnaten kiam lam a pan zel avangin nasa zawkin lui hi humhalh an ngai a, hetaing dan siam hi a tul a ni,” a ti.
He dan duang tura Sub Committee dina chairman, minister C Lalrinsanga chuan sik leh sa inthlak danglam nasat avangin sawrkarin hmathlir thui tak neiin, lui humhalhna dan neih chu tha a tih avangin a ruangam tur duan a ni a. Dan puitling leh fuankim tak a nih theihna’n tui leh lui chungchanga dan awmsate zirchiangin, chu’ngte nen enmilin dan hi duan chhin a ni tih a sawi.
The Mizoram (Protection of Rivers) Bill 2023 duan chhin hi sawiho niin, he danin a hrut leh a kaihhnawih sawrkar department hrang hrang – PHE, EF&C, Agriculture, Irrigation & Water Resources, LRS & WC, Local Administration, LR&S leh Fisheries department-te aiawh bakah GAD leh Planning & Programme Implementation secretary te an tel.
Kumin June 23 khan chief minister hoin State Level Save Tlawng Committee thutkhawm a ni a, Tlawng lui bakah Mizoram lui zawng zawng fuankima dan siam tha an ti a. Chumi dung zuiin sawrkarin deputy chief minister kaihhruaina hnuaiah Committee on Draft Mizoram River Protection Bill din a ni.
Committee-ah hian Agriculture minister, Land Revenue & Settlement minister, LAD minister leh EF&CC minister te bakah department 11 secretary-te chu member an ni. He Committee hian Draft Bill buatsaih turin Agriculture minister kaihhruaina hnuaia Sub-Committee a din leh a. Sub Committee hian member 7 telna Working Group a din ve leh a ni.