Minister-in raltlan tlawh

Minister-in raltlan tlawh
Manipur buaina avanga Mizorama sahimna zawnga tlanlut, Saitual Jail quarters-a awm mekte chu Ningani khan Information & Public Relations minister Lalruatkima chuan a tlawh a, chhawmdawlna a hlan.
Minister chuan Manipura Zofa unaute natna chu Mizorama chengte an unaute natna, an tawrhna pawh an tawmpui a nih avangin an kiangah an ding tlat dawn tih a sawi. Anmahni in leh lo ngeia hlim taka an let theih an duhsak rualin, an himna duha raltlante theih ang tawka chhawmdawl chu Zofa zawng zawngte mawhphurh a ni tih a sawi bawk.
“Assam nen kan ramri a buai a, silai hial a puak a. Assam-in min dan chah vek lai khan, ei tur kan neih chhung chu in nghei bik loang, min ti a. Chutianga min titu kan unaute tuamhlawm hi kan bat a ni. Chutiang chuan min ti lo pawh nise, kan chipuite tuamhlawm hi kan bat a ni tho tho,” a ti.
Pathianin Mizorama remna leh muanna a pek te, sawrkar tha tak kan neite, chief minister nationalist tak kan neite chu Pathianin hmun hrang hranga Zofate kuahkhawmna’n a lo ruahman lawk nia a hriat thu MNF adviser ni bawk Lalruatkima hian a sawi.