Lui thiantuten bawlhhlawh dangtu tur dah an duh tawh

Aizawl tui tlan a lo thianghlim zawk theihnan bawlhhlawh dangtu tur ‘garbage trap (thir len) dah nise an duh a, sawrkarin a rang lamin hma la se an duh tih lui thenfai beihpui thlaktute chuan an sawi.
Tlawng lui fintu luite zawkte thianfaia ni 20 chhung beihpui thlak tawh, ‘Save the Riparian’ chuan Aizawl tui tlan Tlawng lui fintu lui kawr tihfai project hi kumin March 26 khan an tan a, ni 20 chhunga zawh tum ni mah se, a hautak em avangin metre 2000 chuang hret tihfai hman a ni.
Luite tihfainaah hian, Save the Riparian hnathawh hi pawl hrang hrangin an tawiawm a. Sawrkar lam atangin UD&PA, AMC leh PHE-in an thawhpui a, pawl leh mimal tlawmngai engemawzatin an thlawp a, tha thawh piahlamah sum leh paia pui an awm bawk.
Bawlhhlawh paihna mumal loh avangin kawr tihfai hian awmzia a nei thui lo hle tih project bul tantute hian an sawi a. Kulikawn leh Model Veng inrina kawra dumping ground awm chu a fuh lo hlein an hria. Septic tank nei mumal lo, soak pit atanga kawra thli paih an awm bakah kawra ran thi paih an awm thin tih an sawi a ni.
Inrinni hnatlangah hian MZP Gen. Hqrs, 2 Assam Rifles, Zo Trek, BVP Riders Salem Veng, ZMC-a MBBS 1st batch, Solomon’s H/S Kulikawn, D’Purification leh midang engemawzat an thawkchhuak a. Hmingliani Catering-in hnatlangte ei tur an tum sak a ni.
Save the Riparian hian lui thenfai hi a la tul em avangin kalpui zel an tum tih an sawi a. Tui luankawra bawlhhlawh paih tawh lo turin mitin an ngen nawn a ni.