Luman Rus nuai 40 nei ve ve Maoist hruaitu pahnih that

Chhattisgarh Maoist hruaitu pahnih, an luman Rs nuai 40 chhiar lai vel chu venhim hna thawktute nen Narayanpur district-a an inbeihnaah thah an ni tih police thuneituten an sawi.
Dan pawna awm mek, Communist Party of India (Maoists) Central Committee member ni lai ve ve, kum 63 mi, Katta Ramachandra Reddy tia koh bawk, Raju Dada leh kum 67 mi, Kadari Satyanarayana Reddy tia an koh bawk, Kosa Dada te chu thah an ni.
Beihpui thlakna hi Union Home Minister Amit Shah pawhi fakin venhim hna thawktuten ‘hnehna ropui tak an chang’ tih a sawi.
Chief Minister Vishnu Deo Sai-a pawhin ‘Maoism beihnaah Chhattisgarh-in thutlukna dik a siam zel’ tih a sawi ve bawk.
Inkahna hi Maharashtra nena an inrina bul lawk, Abhujmaad ram ngawa Thawhtanni tuka chhuak a ni a. Venhim hna thawktute hi an thu dawn bawhzuiin an thawk chhuak niin Narayanpur Superintendent of Police Robinson Guria chuan a sawi.
Darkar eng emaw zat an inkah hnua silai ri a reh hnuah mipa pahnih ruang an hmu ta tih a sawi.
Inkahna hmunah hian AK-47 rifle, INSAS rifle leh BGL (barrel grenade launcher) pakhat theuh, puak thei eng emaw zat, Maoist thu pawimawh leh ni tin hman chi thil dangte an hmu tel tih a sawi bawk.
Raju Dada leh Kosa Dada te hi Karimnagar, Telangana mi niin Bastar biala Maoist chet velna thununtu, Dandakaranya Special Zonal Committee-a kum 30 chuang lo phusa hle tawh an ni tih police hotu chuan a sawi.
SP Guria chuan Bastar-a tharum thawhna hrang hrang, venhim hna thawktu leh civil mi tam takin an tawrhnaah a ruahmanna siamtu ber an ni tih a sawi.
“Raju Dada hian hming dang Gudsa Usendi, Vijay leh Vikalp tih a nei a. Kosa Dada pawh hi Gopanna leh Buchanna tia sawi a ni thin bawk a. Chhattisgarh-ah hian an luman Rs nuai 40 ve ve chhiar an ni,” a ti.
Maoist helte hi Indian sorkar chuan March, 2026-ah ram chhung atanga nuai bo vek tum an ni a, hemi atan hian beihpui pawh thlak mek zel a ni.
Inspector General of Police (Bastar Range) Sundarraj P chuan tun hnaiah Maoist-te hi an inhloh nasa hle tih a sawi a. “Ram chhengchhia leh khaw awm dan zir lo tak karah Bastar-a police le venhim hna thawktute hian sorkar laipui leh leh Chhattisgarh sorkar bakah Bastar-a chengte tan an bei zel a ni,” a ti.
Maoist hruaitu pahnih thah lehte nen hian kumin Chhattisgarh-ah hian an member 249 thah an ni tawh a. Heng zinga 220 hi Bastar division an tih huam chhunga district pasarihah a ni a, mi dang 27 hi Raipur division-a Gariaband district-ah thah an ni a. Durg division-a Mohla-Manpur-Ambagarh Chowki district-ah pahnih thah an ni bawk.
An hruaitu thah tawh zinga langsar ber chu kum 70 mi, Communist Party of India (Maoist) General Ssecretary Nambala Keshav Rao a ni a, central committee member pasarih thah an ni tawh bawk.