Lung na vanga damdawi in lut Oscar-a

Lung na vanga damdawi in lut Oscar-a
Chelsea tan game 203 khela goal 38 thun tling Brazil midfielder hlui Oscar kha lung natna avangin Thawhlehni khan Sao Paulo khaw damdawi inah dahluh niin, a dinhmun a ngialnghet a, a dinhmun vil reng a ni tiin a club vawn thar ber Brazilian side Sao Paulo thuchhuah chuan a tarlang.
Kum 34 mi hi season thar atana inbuatsaihna an tan dawnin Sao Paulo training centre-a a hriselna dinhmun an endik laiin a chau thut a; an training centre-ah hian Einstein Hospital Israelita atanga an rawih medical team-te’n an endik laiin a tlu a, damdawi in lama admit nghal niin, a natna chiah hre tura test chi dang dang tih chhunzawm a nih thu leh hlauhthawnawm erawh a nih loh thu club thuchhuah chuan a tarlang tel.
Brazilian publication Globo lamin an report dan chuan Oscar hi training ground-a a hriselna dinhmun an endiknaah exercise bike hmangin a thaw a han tisa chu a chau zui a mai a, nikhaw hre loa a awm chhung pawh minute hnih lai niin an sawi!
Globo vekin a tarlan zui zel danin, hetia a han awm takah chuan Oscar hian chawlh lam a ngaihtuah chhunzawm dawn!
Brazil international hlui hian Stamford Bridge-a hming a chher hnuah rin loh takin sum tam zawk hlawh theihna China a pan ta daih a nih kha!
Nikum December thla khan a career bul a tanna an ram club lian Sao Paulo-ah kirlehin, Chelsea leh Argentina striker hlui Hernan Crespo enkawl Sao Paulo-ah hian kum thum daih contract ziakin, an inremna ang chuan kum 2027 thleng hun a la nei a, mahse, a hriselna heti a nih takah chuan season tharah hian a inkhel chhunzawm thei dawn em a chiang ta rih lo.